Լևոն Քոչարյանը հաստատում է` Ռոբերտ Քոչարյանին թույլ չեն տվել լքել երկիրը․ ՏԵՍԱՆՅՈւԹ

«Ես, ճիշտն ասած, նույնպես լուրերից եմ տեղեկացել։ Հերթական լկտիությունն ու ապօրինությունն է, որի իրավունքը ոչ մի ձև չունեն, բայց մենք տեսնում ենք՝ ինչ է կատարվում»,-այս մասին Factor TV-ի լրագրողի հարցին ի պատասխան նշեց Լևոն Քոչարյանը՝ խոսելով իր հոր՝ Ռոբերտ Քոչարյանի նկատմամբ կիրառված սահմանափակման մասին։

Նշենք, որ քիչ առաջ սկսեցի լուրեր տարածվել այն մասին, որ 2-րդ նախագահին արգելել են լքել Հայաստանը։ Այսօր ավելի վաղ «Հայաստան» դաշինքը հայտարարություն էր տարածել այն մասին, որ Ռոբերտ Քոչարյանը եռօրյա այցով մեկնելու է Հայաստանից, այցն էլ անձնական բնույթ է կրում, վաղուց պլանավորված էր և հետաձգվել էր նախընտրական խիտ գրաֆիկի պատճառով։

Հայտարարության մեջ նշված չէր, թե որտեղ է մեկնելու Ռոբերտ Քոչարյանը, սակայն որդին հայտնեց՝ պետք է Ռուսաստան մեկներ։

«Մենք նախօրոք՝ հենց հաշվի առնելով վերջին օրերի մի քանի նման դեպքերը, երբ այս իշխանական քարոզչական մեքենան յուրաքանչյուր անձի դուրս գնալը մեկնաբանում է ուրիշ ձև, հենց դրա համար նախօրոք է հայտարարվել դրա մասին։ Որ այստեղ ոչ մի բան չկա. մի քանի օր պետք է մեկներ, բայց միևնույն է՝ իրենց շոուն արեցին, իրենց ապօրինությունն արեցին»,-ասաց նա։

Քոչարյանի՝ Հայաստանից հեռանալու լուրերի ֆոնին վարչապետ Նիկոլ Փաշինյանը տեսանյութ է հրապարակել, որում ասում է․ «Ափալ-թափալ մի հավաքեք ձեր ճամպրուկները, դուք երազելու եք Հայաստանից փախչելու հնարավորության մասին և չեք ունենալու այդ հնարավորությունը»։