Այս ընտրությունները պատմական նշանակություն ունեն. որոշում ենք այսօր մեր ապագան. Թաթոյանը քվեարկեց․ ՏԵՍԱՆՅՈՒԹ

«Մենք այսօր որոշում ենք մեր ապագան: Մենք որոշում ենք մեր երեխաների համար՝ ինչ երկիր ենք մենք ունենալու, մեզ համար»,- ԱԺ ընտրություններում քվեարկելուց հետո լրագրողների հետ զրույցում ասաց «Միասնության թևեր» կուսակցության վարչապետի թեկնածու Արման Թաթոյանը։

Նրա խոսքով՝ եթե երիտասարդներն ուզում են ապրել այնպիսի երկրում, որն ապահով ապագա է տալիս, ինչպես նաև ժամանակակից կրթություն, բարձր աշխատավարձով աշխատանք, ապա անպայման պետք է գնան ընտրության, քվեարկեն հանուն երկրի։

«Շատ կարևոր է, որպեսզի մեր սերունդների միջև համերաշխություն լինի, ես դա շատ կարևոր եմ համարում: Եվ մեր քաղաքացիներին խնդրում եմ նաև ընտրություն կատարելիս, որովհետև ես գիտեմ՝ շատ մարդիկ դեռ նոր են որոշում կամ, ամեն դեպքում, քվեախցիկում մարդ իր խղճի հետ է, ինչ ուզում ես՝ արա, մեկ է՝ խղճի հետ է մնում մենակ: Ես խնդրում եմ, որ նրանք հաշվի առնեն, թե ով իսկապես կարող է երկիրը ղեկավարել, ով է հասկանում պետությունից, ով է պատկերացնում՝ ինչ է նշանակում պետական կառավարման համակարգ, ոչ թե մարդիկ, որոնք կարող են ուրախությունների ժամանակ ուտել-խմելով զբաղված լինել, այլ մարդիկ, ովքեր իսկապես, քնած թե արթուն, ուշադիր հետևում են, որպեսզի ամեն մեկի կյանքը լինի բարելավված, արդար և դրանից բացի, ովքեր դժվար պահերին ապացուցել են, որ կարող են մարդկանց հետ լինել, ովքեր դժվար պահերին երբեք չեն լքել մարդուն, անգամ իրենց անձնական զոհողությունների գնով»,- նշեց նա։

Մանրամասները՝ տեսանյութում։