24.10.2026 | 19:14
Վթար Արենի բնակավայրի մոտ. փրկարարները հատուկ տեխնիկայի միջոցով վարորդին դուրս են բերել ավտոմեքենայից
Թուրքիայի սևծովյան ափին երեք լցանավեր ԱԹՍ-ների հարձակման են ենթարկվել
Քաղաքականություն
28.05.2026 | 22:14
Սև ծովում՝ Թուրքիայի հյուսիսային ափի մոտ, երեք լցանավեր ենթարկվել են անօդաչու թռչող սարքերի հարձակման։ Նավերի անձնակազմերի բոլոր անդամներն անվտանգ են, հայտնում է Ստամբուլում գործող Tribeca նավագնացության գործակալությունը, գրում է Turkiye Minute-ը։
Պալաուի դրոշի ներքո նավարկող James II լցանավը, որը բեռ չէր տեղափոխում, միջադեպի պահին գտնվել է Սև ծովում՝ Թուրքելիից մոտ 80 կիլոմետր հյուսիս, հայտնում է գործակալությունը։ Սիերա Լեոնեի դրոշի ներքո նավարկող երկու լցանավեր՝ Altura-ն և Velora-ն, նույնպես ենթարկվել են հարձակման մոտակա ջրերում՝ նավից նավ գործողություն իրականացնելիս։ Երկու նավերն էլ այդ պահին նավարկում էին առանց բեռի։
Նավերին օգնելու համար ուղարկվել են առափնյա անվտանգության պահպանության ծառայության և փրկարարական նավակներ։ Հարձակումների համար պատասխանատվություն անմիջապես ոչ ոք չի ստանձնել։
Դեպքը տեղի է ունեցել Սև ծովում ծովային անվտանգության վերաբերյալ նոր մտահոգությունների ֆոնին, որտեղ Ռուսաստանը և Ուկրաինան հաճախակի թիրախավորում են միմյանց նավահանգիստները, էներգետիկ ենթակառուցվածքները և նավերը՝ 2022 թվականի փետրվարին Ուկրաինայի վրա լայնածավալ ներխուժումից ի վեր։
Թուրքիան ուկրաինական պատերազմի ամբողջ ընթացքում սերտ կապեր է պահպանել ինչպես Կիևի, այնպես էլ Մոսկվայի հետ և բազմիցս զգուշացրել Սև ծովում հակամարտության տարածման մասին։ Երկրի նախագահ Ռեջեփ Թայիփ Էրդողանը դեկտեմբերին զգուշացրել է, որ Սև ծովը չպետք է դառնա Ռուսաստանի և Ուկրաինայի միջև «բախման գոտի»՝ տարածաշրջանում նավերի վրա մի շարք հարվածներից հետո։
Անկարան նաև բողոքել է «մտահոգիչ սրացման» հետ կապված՝ Ուկրաինայի կողմից Թուրքիայի ափերի մոտ Ռուսաստանի հետ կապված լցանավերի վրա հարձակումներից հետո։ Թուրքական նավն ավելի ուշ վնասվել է Ուկրաինայի Օդեսա նավահանգստային քաղաքի մոտակայքում ռուսական ավիահարվածի ժամանակ, այն բանից հետո, երբ Էրդողանը հեռախոսազրույց էր ունեցել Ռուսաստանի նախագահ Վլադիմիր Պուտինի հետ։
Վերլուծաբանները զգուշացրել են, որ Սև ծովում առևտրային նավերի ու լցանավերի վրա հարձակումներն աճող ռիսկեր են ստեղծում նավագնացության և տարածաշրջանային անվտանգության համար, հատկապես այն պատճառով, որ պատերազմն ավելի ու ավելի է տարածվում Թուրքիային մոտ գտնվող ջրերում։
Թարգմանությունը՝ Էմմա Չոբանյանի
