24.10.2026 | 15:55
Համբարձում Մաթևոսյանը հանդիպել է Զիմբաբվեի շրջակա միջավայրի նախարարին
Շվեդիան մտադիր է Ուկրաինային Gripen կործանիչներ փոխանցել
Քաղաքականություն
28.05.2026 | 15:55
Շվեդիան նախատեսում է Ուկրաինային փոխանցել Saab-ի կողմից արտադրված մի քանի JAS 39 Gripen կործանիչներ՝ C և D մոդիֆիկացիայի, հայտնում է շվեդական Aaftonbladet թերթը։ Current time-ի հաղորդմամբ՝ ինքնաթիռների ճշգրիտ քանակը և մատակարարման ժամկետը չի նշվում։
Միաժամանակ, ըստ որոշ տեղեկությունների՝ բանակցություններ կսկսվեն Ուկրաինային JAS 39 Gripen կործանիչների E սերնդի վաճառքի շուրջ։ Սա իր դասի ինքնաթիռների վերջին սերունդն է. դրանք հագեցած են ավելի հզոր շարժիչով, ունեն ավելի մեծ հեռահարություն, ինչպես նաև ժամանակակից ռադարային և էլեկտրոնային համակարգեր։
Aftonbladet-ի փոխանցմամբ՝ Ուկրաինան ինքնաթիռների գնումը կֆինանսավորի ԵՄ-ի վարկով։
2025 թվականի հոկտեմբերին Ուկրաինայի նախագահ Վլադիմիր Զելենսկին և Շվեդիայի վարչապետ Ուլֆ Քրիստերսոնը ստորագրել էին փոխըմբռնման հուշագիր, որը նախատեսում է մինչև 150 JAS 39 Gripen E կործանիչների հնարավոր ձեռքբերում: Ծրագիրը նախատեսված է 10-15 տարվա համար և գնահատվում է շուրջ 10 միլիարդ դոլար։
Փաստաթուղթը նախատեսում է ոչ միայն ինքնաթիռների վաճառք, այլև օդաչուների վերապատրաստում և այդ կործանիչների սպասարկման համար համատեղ տեխնիկական բազայի ստեղծում: Ուկրաինացի օդաչուները Gripen-ի վրա առաջին վերապատրաստումը սկսել են 2023 թվականի օգոստոսին։
«Gripen-ները հայտնի են իրենց մանևրելու, հուսալիության և ցածր շահագործման ծախսերի, ինչպես նաև կարճ թռիչքուղիներից և նույնիսկ մայրուղիներից թռիչք կատարելու ունակությամբ, ինչը դրանք իդեալական է դարձնում «ամբողջական պաշտպանության» հայեցակարգի համար: Gripen-ն ավելին է, քան պարզապես ինքնաթիռ, այն շվեդական պաշտպանական փիլիսոփայության մարմնացում է՝ «Խելացի, արդյունավետ, անկախ տեխնոլոգիա ժողովրդավարության պաշտպանության համար»»,- անցյալ տարի գրել էր Շվեդիայում Ուկրաինայի դեսպան Սվետլանա Զալիշչուկը Զելենսկիի այցի ժամանակ:
Միաժամանակ, Վլադիմիր Զելենսկին հայտարարել է, որ այսօր աշխատանքային այցով կլինի Շվեդիայում։
«Մենք պատրաստում ենք Ուկրաինայի համար պաշտպանական մեծ փաթեթ և Gripen կործանիչների վերաբերյալ ուժեղ քայլ, որը, անկասկած, մեր մարտական ավիացիան ավելի արդյունավետ կդարձնի»,- գրել է նա։
Ստոկհոլմում Զելենսկին կհանդիպի Շվեդիայի վարչապետ Ուլֆ Քրիստերսոնի հետ, որտեղ նրանք կներկայացնեն ավիացիայի հետ կապված նորությունները, հայտնել է Շվեդիայի կառավարությունը։
Թարգմանությունը՝ Էմմա Չոբանյանի
