«Բաստիոն» ֆրանսիական արտադրության զրահամեքենաները՝ զորահանդեսին․ ՏԵՍԱՆՅՈՒԹ

Հանրապետության օրվան նվիրված շքերթի ընթացքում Հրապարակով անցան Հատուկ նշանակության ուժերն ու «Բաստիոն» ֆրանսիական արտադրության զրահամեքենաները։

«Բաստիոն» տեսակի զրահամեքենան թեթև զրահապատ մեքենաների նոր սերնդի ներկայացուցիչ է։ Այն սպառազինված է աշխարհում առաջատար համարվող 12․7 միլիմետր խոշոր տրամաչափի «Էմ-2» տեսակի գնդացիրներով։

Զրահամեքենան կահավորված է նաև ներսից կրակ վարելու համար նախատեսված սողանցքերով։

«Բաստիոնը» բազմակի նշանակության զրահապատ մեքենա է՝ նախատեսված բարդ տեղանքում անձնակազմի արագ խնդիրների կատարման շրջան տեղափոխելու, հետախուզություն վարելու, պայմանական հակառակորդի վրա կրակային ներգործություն ապահովելու, ինչպես նաև ղեկավարում ու պարեկություն իրականացնելու համար։

Նշվում է, որ «Բաստիոն» զրահամեքենան իր զորաշարժային և կրակային հնարավորություններով բարձրացրել է հատուկ նշանակության ստորաբաժանումների կիրառման արդյունավետությունը՝ ապահովելով օպերացիաների իրականացման գաղտնիությունը, հանկարծակիությունը, օպերատիվությունը, հատուկ մարտավարությունների կիրառումը, շարժունակությունը և ինքնաբավ գործելու՝ փոքր ուժերով մեծ խնդիրներ կատարելու հնարավորությունը։

Զրահամեքենայի իրանը պատված է ամբողջական եռակցված զրահապատով, ինչն ապահովում է երրորդ մակարդակի բալիստիկ պաշտպանություն։ Իրանի V-աձև կառուցվածքը և հատուկ տեխնոլոգիայով պատրաստված անվադողերն ապահովում են անձնակազմի պաշտպանվածությունը  հակատանկային, հակահետևակային ականներից և ինքնաշեն պայթուցիկ սարքավորումների ազդեցությունից։

Անձնակազմի կենսունակության բարձրացման նպատակով զրահամեքենան կահավորված է պայթյունակայուն նստատեղերով։

Մանրամասները՝ տեսանյութում։

Անի Թամազյան