Պուտինը հայտարարել է ՀԱՊԿ-ի միասնականության անհրաժեշտության մասին

Ռուսաստանի նախագահ Վլադիմիր Պուտինը հայտարարել է, որ Հավաքական անվտանգության պայմանագրի կազմակերպության անդամները պետք է պահպանեն մոտեցումների միասնականությունն ու սերտ համակարգումը «անկայուն աշխարհաքաղաքական իրավիճակի պայմաններում», գրում է Ինտերֆաքսը։

«Ներկայիս աշխարհաքաղաքական իրավիճակը մնում է անկայուն։ Այդ կապակցությամբ կարևոր է պահպանել մոտեցումների միասնությունը և սերտորեն համակարգել մեր գործողությունները՝ լուծելու  ՀԱՊԿ-ի առջև ծառացած ռազմավարական առաջադրանքները և ընդլայնել նրա վերլուծական ներուժը իրավիճակի  մանրակրկիտ և համապարփակ վերլուծության համար»,- ասվում է ՌԴ նախագահի՝ անվտանգության միջազգային համաժողովի մասնակիցներին ուղղված ողջույնի ուղերձում, որն ընթերցել է Ռուսաստանի Անվտանգության խորհրդի քարտուղար Սերգեյ Շոյգուն։

«Հաշվի առնելով կանխատեսվող մարտահրավերներն ու ռիսկերը՝ ժամանակին  մշակել և արդիականացնել ՀԱՊԿ Հավաքական անվտանգության խորհրդի և դրա մյուս կանոնադրական մարմինների որոշումները, առաջին հերթին ռազմական ոլորտում, տեղեկատվական և կենսաբանական անվտանգության, ահաբեկչության դեմ պայքարի, ծայրահեղականության, թմրանյութերի ապօրինի շրջանառության և անօրինական միգրացիայի դեմ պայքարի ոլորտներում»,- նշել է ՌԴ նախագահը։

Պուտինը նաև հայտարարել է արդյունաբերական համագործակցության խորացման և տեխնիկական համագործակցության զարգացման անհրաժեշտության մասին։

Հիշեցնենք, որ ՀՀ-ն սառեցրել է ՀԱՊԿ-ին մասնակցությունը։

Թարգմանությունը՝ Էմմա Չոբանյանի