06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
ԱՄՆ պաշտոնյաները հայտարարել են, որ Իրանի հետ համաձայնագիրը 95%-ով պատրաստ է
Քաղաքականություն
25.05.2026 | 11:31
ԱՄՆ պաշտոնյաները Fox News-ին հայտնել են, որ Իրանի հետ շրջանակային համաձայնագիրը «95%-ով պատրաստ է», միաժամանակ հավելել, որ բանակցողները դեռևս վիճում են Թեհրանի միջուկային պաշարների և Հորմուզի նեղուցի վերաբերյալ «ձևակերպումների» շուրջ։
«Մենք չենք պատրաստվում հետաձգել գործընթացը։ Դեռևս համաձայնության չենք եկել։ Այսօր կամ վաղը համաձայնագիր չենք ստորագրելու»,- ասել է աղբյուրներից մեկը, այնուհետև հավելել, որ ԱՄՆ նախագահ Դոնալդ Թրամփը մտադիր է մի քանի օր ժամանակ տալ համաձայնության հասնելու համար։
Պաշտոնյան նաև ասել է, որ Իրանը «սկզբունքորեն համաձայնել է պայմանների շրջանակին, և մենք 95%-ով համաձայն ենք»։
«Մենք համաձայնություն ունենք միջուկային պաշարների և Հորմուզի նեղուցի վերաբերյալ, բայց բանակցում ենք ձևակերպումների շուրջ։ Մենք հնարավորություն ունենք կնքելու մի գործարք, որը կնվազեցնի ամերիկացիների ծախսերը՝ միաժամանակ ապահովելով, որ իրանցիները չստանան միջուկային զենք։ Մենք վատ գործարք չենք կնքելու, դա հաստատ է։ Մենք ունենք ընտրովի հնարավորություն և կարող ենք վերսկսել ռազմական հարվածները, եթե համաձայնագիր չկնքվի»,- նշել է նա։
Կիրակի ԱՄՆ նախագահ Դոնալդ Թրամփը բանակցողներին հանձնարարել է «չշտապել համաձայնության հարցում» և շեշտել, որ «ժամանակը մեր օգտին է»։
Մինչ այդ էլ նա հայտարարել էր, որ Իրանի հետ համաձայնագիրը, որը նա նկարագրել է որպես «փոխըմբռնման հուշագիր», «մեծ մասամբ բանակցվել է»։
Թարգմանությունը՝ Էմմա Չոբանյանի
