ՄԻՊ-ը՝ դասապրոցեսի հաշվին ՔՊ հանրահավաքին ուսուցիչների և աշակերտների մասնակցության մասին․ ՏԵՍԱՆՅՈՒԹ

Մարդու իրավունքների պաշտպան Անահիտ Մանասյանը Factor TV-ի հարցին ի պատասխան անդրադարձավ երեկ Արագածոտնի մարզում ՔՊ քարոզարշավի ընթացքում դպրոցականների, ուսուցիչների մասնակցությանը:

«Մենք, ըստ էության, երեկ այս հարցի հետ կապված ինքներս ենք մշտադիտարկում իրականացրել: Մի քանի հարցադրումներ ենք ունեցել և դրա հետ կապված երեկ ես հրապարակային հայտարարություն եմ տարածել՝ անդրադառնալով այն հանգամանքին, որ ճիշտ է` երիտասարդների, երեխաների մասնակցությունը տարբեր հանրային նշանակություն ունեցող գործընթացներին կարևոր է, իրենք, այո, պետք է մասնակցեն որոշում կայացնելու գործընթացներին, բայց եթե խոսքը երեխաների կրթության իրավունքին է վերաբերում, ապա ակնհայտ է, որ այն պետք է լինի առաջնահերթ, և դասապրոցեսը որևէ կերպ չպետք է խաթարվի տարբեր հանգամանքներով, այդ թվում՝ քաղաքական գործընթացներով պայմանավորված»,- ասաց Մանասյանը:

Նա նշեց, որ ՄԻՊ-ի լիազորությունները չեն վերաբերում վարչական ռեսուրսի հնարավոր չարաշահման կամ ընտրական գործընթացների վերահսկողությանը, և իրենց հիմնական գործառույթը կրթության իրավունքի երաշխավորումն է։

«Մենք ստացել ենք կամավոր եղանակով հավաքի մասնակցության ահազանգ, որի պատճառով խաթարվել է դասապրոցեսը։ Հետևաբար, այդ պրոցեսն ենք ուսումնասիրում»,- ասաց Մանասյանը:

Հարցին` արդյոք կապ հաստատե՞լ են դպրոցի տնօրինության հետ, ՄԻՊ-ն ասաց, որ իրենց գրասենյակն ունի հաղորդակցության տարբեր մեթոդներ, այդ թվում՝ գրավոր պարզաբանումներ պահանջելու ձևաչափ:

Ճշտող հարցին` արդեն պարզաբանումներ խնդրել են, ասաց: «Դրա հետ կապված կզբաղվենք»,- եզրափակեց Անահիտ Մանասյանը:

Մանրմասները` տեսանյութում: