Սամվել Կարապետյանին թույլ չեն տալիս այցելել իր հոր գերեզմանին․ Վարդևանյան․ ՏԵՍԱՆՅՈւԹ

Հայաստանի Հանրապետությունում մարդասիրությունը պետք է միավորող արժեք լինի, անկախ բոլորի քաղաքական հայացքներից։ Այս մասին ԿԸՀ-ի մոտ լրագրողների հետ զրույցում նշեց «Ուժեղ Հայաստան»-ի անդամ, փաստաբան Արամ Վարդևանյանը՝ խոսելով կուսակցության առաջնորդ Սամվել Կարապետյանին տնային կալանքի տակ պահելու դատարանի որոշման մասին։

«Մենք կարող ենք իրար հետ լինել հակադիր բևեռներում, մենք կարող ենք ունենալ տիտանական անհամաձայնություններ, բայց մարդասիրությունը բոլորիս միավորող արժեքը պետք է լինի։ Բա այդ պայմաններում դուք ինչպե՞ս կգնահատեք այն որոշումը, որ Սամվել Կարապետյանին նույնիսկ թույլ չեն տալիս այցելել իր հոր գերեզմանին։ 24 ժամով նույնիսկ այդ հնարավորությունը չի ընձեռվում։ Սա արդյո՞ք ողջամիտ է, սա արդյո՞ք մարդասիրության արժեքից բխո՞ղ է»,-նշեց նա։

Լրագրողներից մեկի այն հարցին, թե ինչպե՞ս պետք է տնային կալանքի տակ գտնվող Կարապետյանը գնա ընտրատեղամաս՝ քվեարկի, Վարդևանյանը պատասխանեց․ «Ես իսկապես աննահանջ հույս ունեմ իրավունքի գերակայության վերաբերյալ, մարդասիրության վերաբերյալ, ես հավատում եմ, որ մայիս ամսվա ընթացքում Սամվել Կարապետյանի նկատմամբ կիրառված ակնհայտ ապօրինի տնային կալանքը որպես խափանման միջոց պետք է վերացվի։ Մի հանգամանք նշեմ։ Այսօր արձանագրվեց, որ «Ուժեղ Հայաստան» կուսակցությունների դաշինքը այլևս մասնակցում է ընտրություններին։ «Ուժեղ Հայաստան» կուսակցության նախագահը Սամվել Կարապետյանն է։ Արդյո՞ք կուսակցության նախագահը պետք է հնարավորություն չունենա մասնակցելու քարոզարշավին։ Երբ մենք ներկայացնում էինք մեր դիրքորոշումը հակակոռուպցիոն դատարանում նիստի ընթացքում, մենք դեռևս այս իրավական փաստը չունեինք։ Այլևս այդ փաստը առկա է։ Տեսնենք, թե ինչ դիրքորոշում կարտահայտի դատարանը»։

Մանրամասները՝ տեսանյութում։