17.08.2026 | 12:26
Բրյուսովի համալսարանին հանձնված գույքի ապօրինի օտարման գործով 3 անձի վարույթն ուղարկվել է դատախազին
Մուստաֆաևը, Ալեքսանյանի Rols-Roys-ն ու Աղվերանի փակ հանդիպումը․ ինչ է հայտնի Բաքվի պաշտոնյայի այցից․ ՏԵՍԱՆՅՈՒԹ
Քաղաքականություն
29.04.2026 | 23:34
Աղվերանի «Apricot» հյուրանոց տանող ճանապարհն այսօր փակ էր։ Այն հսկում էին ՊՊԾ ծառայողները․ հենց այս հյուրանոցում էր Ադրբեջանի փոխվարչապետ Շահին Մուստաֆաևի գլխավորած պատվիրակությունը հանդիպում անցկացնում հայ գործընկերների հետ։ Տարածքում աշխատող Factor TV-ի նկարահանող խումբը ՊՊԾ աշխատակցից փորձեց մանրամասներ ճշտել։
«Մուտքը սահմանափակված է լրագրողների համար, փակ միջոցառում է, լրագրողները հրավիրված չեն»,- ասաց Պետական պահպանության ծառայության աշխատակիցը։
Մի քանի ժամ տևած հանդիպումից հետո մոտ երկու տասնյակ մեքնենաներից բաղկացած շարասյունը հեռացավ հյուրանոցից։
Մեր տեսախցիկը հանդիպման վայրից հեռացող մեքենաների շարքում արձանագրեց նաև գործարար Սամվել Ալեքսանյանին պատկանող 2025 թվականի արտադրության Rolls-Royce մակնիշի ավտոմեքենան։ Արդյոք նա անձամբ մասնակցում էր հանդիպմանը՝ մեզ չհաջողվեց պարզել։ Բայց այն որ գործարարներ են մասնակցել հանդիպմանը, ավելի ուշ պարզ դարձավ պաշտոնական հաղորդագրության հրապարակմամբ։ Ըստ ԱԳն-ի՝ գործարար շրջանակների ներկայացուցիչների մասնակցությամբ քննարկվել են առևտրատնտեսական համագործակցության զարգացմանը, ապրանքների և ծառայությունների փոխադարձ մատակարարումներին, ինչպես նաև տարանցիկ փոխադրումներին վերաբերող հարցեր։
Աղվերանում նաև քննարկվել են սահմանազտմանը վերաբերող հարցեր։ Սա Շահին Մուստաֆաևի և Մհեր Գրիգորյանի գլխավորած հանձնաժողվների արդեն 13-րդ հանդիպումն էր։ Կողմերը համաձայնեցրել և փոխանակել են սահմանազատման աշխատանքների իրականացման կարգի վերաբերյալ հետևյալ ուղեցույցների նախագծերի տեքստերը։
«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման ընթացքում սահմանազատման փորձագիտական խմբերի աշխատանքի կարգի մասին ուղեցույց»,
«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման քարտեզի ստեղծման կարգի մասին ուղեցույց»,
«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման փաստաթղթերի ձևակերպման և հրատարակման կարգի մասին ուղեցույց»,- նշված է ԱԳՆ հաղորդագրության մեջ:
Հանդիպման արդյունքներով ստորագրվել է համապատասխան արձանագրություն: Կողմերը պայմանավորվել են աշխատանքային կարգով համաձայնեցնել Ադրբեջանի Հանրապետությունում հաջորդ հանդիպման անցկացման ամսաթիվը: Երկու երկրների պատվիրակությունների միջև վերջին հանդիպումը տեղի էր ունեցել 2025 թվականի նոյեմբերի 28-ին Ադրբեջանի Գաբալա քաղաքում։
Ապրիլի 26-ին ԱԱԾ սահմանապահ զորքերի կազմավորման օրվան նվիրված միջոցառմանը վարչապետ Նիկոլ Փաշինյանը անդրադարձել է նաև Ադրբեջանի հետ սահմանազատման գործընթացին՝ ընդգծելով Տավուշի արդեն սահմանազատված 12 կմ հատվածը։
«Առաջիկայում մենք կշարունակենք և ավարտին կհասցնենք տրամբանական ժամկետներում Հայաստանի և Ադրբեջանի միջև սահմանի սահմանազատումը։ Օրակարգում ունենք նաև Վրաստանի հետ սահմանազատման ամփոփման օրակարգը և վրաց գործընկերների հետ այս մասին արդեն պայմանավորվածություններ ունենք»,- ասել է Փաշինյանը։
2024 ապրիլի 19-ին կողմերը համաձայնեցին սկսել սահմանազատումը Տավուշ-Ղազախ հատվածից։ Սա դարձավ առաջին փաստացի սահմանազատված հատվածը։ Մասնավորապես՝ Բաղանիս, Ոսկեպար, Կիրանց, Բերքաբեր հատվածներն էին առաջինը, որտեղ գործնական սահմանազատում իրականացվեց։
2024 թվականի օգոստոսի 30-ին ստորագրվեց հանձնաժողովների համատեղ գործունեության կանոնակարգը։ 2025 թվականի հունվարի 16-ին որոշվեց սահմանազատման հաջորդ փուլը սկսել արդեն հյուսիսային հատվածից՝ Հայաստան – Ադրբեջան – Վրաստան սահմանների հատման կետից և շարունակել դեպի հարավ՝ մինչև Իրանի սահման։
Մանրամասները՝ տեսանյութում։
Անի Թամրազյան
