Իսրայելը Լիբանանի հետ «լուրջ տարաձայնություններ» չունի. Իսրայելի ԱԳ նախարար

Իսրայելի արտաքին գործերի նախարար Գիդեոն Սաարը կոչ է արել Բեյրութին համագործակցել Իսրայելի հետ՝ Լիբանանում Իրանի կողմից աջակցվող «Հըզբոլլահի» դեմ պայքարելու համար։ Իսրայելի 78-ամյակին նվիրված միջոցառման ժամանակ դիվանագետների հետ զրույցում Սաարն ասել է, որ Իսրայելը «լուրջ տարաձայնություններ» չունի Լիբանանի հետ, սակայն «Հըզբոլլահը» շարունակում է խոչընդոտ հանդիսանալ երկու երկրների միջև խաղաղության և հարաբերությունների կարգավորման համար։

«Ինչպես այն սպառնում է Իսրայելի անվտանգությանը, այն վնասում է նաև Լիբանանի ինքնիշխանությանն ու սպառնում նրա ապագային»,- ասել է պաշտոնյան։

Սպասվում է, որ Իսրայելը և Լիբանանը հինգշաբթի բանակցություններ կվարեն Վաշինգտոնում՝ անցյալ ուրբաթ ուժի մեջ մտած 10-օրյա հրադադարի շուրջ համաձայնությունից հետո, այդ թվում՝ «Հըզբոլլահի» հետ։ Հրադադարի ֆոնին՝ «Հըզբոլլահը» և Իսրայելը փոխանակվել են կրակով։

«Մենք պատմական որոշում կայացրինք՝ ավելի քան 40 տարի անց ուղղակիորեն բանակցել Լիբանանի հետ։ Վաղը Վաշինգտոնում կվերսկսվեն Իսրայելի և Լիբանանի միջև ուղիղ բանակցությունները։ Ես կոչ եմ անում Լիբանանի կառավարությանը՝ եկեք միասին աշխատենք այն ահաբեկչական պետության դեմ, որը «Հըզբոլլահը» կառուցել է ձեր տարածքում։ Այս համագործակցությունն ավելի շատ անհրաժեշտ է ձեզ, քան մեզ։ Այն պահանջում է բարոյական պարզություն և ռիսկի դիմելու քաջություն։ Սակայն ձեզ և մեզ համար խաղաղ ապագա ապահովելու իրական այլընտրանք չկա»,- ասել է Սաարը։

Լիբանանը մարտի սկզբին ներքաշվել է Մերձավոր Արևելքի պատերազմի մեջ, երբ «Հըզբոլլահը» հրթիռներ արձակեց Իսրայելի վրա՝ ի պատասխան ԱՄՆ-ի և Իսրայելի կողմից Իրանի գերագույն առաջնորդ այաթոլլա Ալի Խամենեիի սպանության։ Այնուհետև Իսրայելն ավիահարվածներ հասցրեց Լիբանանին և ցամաքային գործողություն սկսեց։

Թարգմանությունը՝ Էմմա Չոբանյանի