Ադրբեջանին ռազմավարական գործարք ենք առաջարկել․ Փաշինյան․ ՏԵՍԱՆՅՈՒԹ

Հայաստանի վարչապետ Նիկոլ Փաշինյանը ՔՊ նախընտրական ծրագիրը ներկայացնելիս հայտարարել է, որ Ղարաբաղյան շարժումը անհամատեղելի է խաղաղության և անվտանգության հետ՝ ընդգծելով, որ իշխանությունը կատարել է ընտրություն հօգուտ կայունության։

Վարչապետի խոսքով՝ այսօր Հայաստանը ունի խաղաղություն և անվտանգություն, սակայն որոշ քաղաքական ուժեր շարունակում են հրապարակային քննարկումներ նախաձեռնել՝ կապված քարտեզների և «վերադարձի իրավունքի» թեմաների հետ։ Փաշինյանը նշել է, որ նման հարցերի բարձրացումը կարող է նոր լարվածության պատճառ դառնալ՝ հիշեցնելով, որ Ղարաբաղյան հակամարտությունն ի սկզբանե նույնպես սկսվել է հումանիտար բնույթի հարցերից։

Նա շեշտել է, որ նման թեմաները պետք է փակվեն երկկողմ մակարդակով՝ դրանք համարելով խաղաղության պահպանման կարևոր նախապայման։ Վարչապետի գնահատմամբ՝ այս մոտեցումը համապատասխանում է միջազգային իրավունքի սկզբունքներին և կարող է երաշխավորել երկարաժամկետ կայունություն։

«Ե՞րբ է խաղաղությունը դառնում իրական, երբ որ մենք Ադրբեջանին առաջարկել ենք և առաջարկում ենք ռազմավարական գործարք: Ո՞րն է ռազմավարական գործարքը: Որ մենք ճանաչել ենք տարածքային ամբողջականությունը միմյանց և ինքնիշխանությունը Ալմա-Աթայի հռչակագրի հիման վրա, այսինքն՝ Խորհրդային Միության տարածքով… ներողություն, Խորհրդային Հայկական ԽՍՀ և Ադրբեջանական ԽՍՀ տարածքներով: Ուրեմն ճանաչում ենք ճշգրիտ, դելիմիտացիա ենք անում և հանգիստ ենք թողնում իրար: Հանգիստ… էլ չենք բան անում, փորփրում՝ ով երբ որտեղ է ապրել և այլն և այլն, ինչ է ունեցել, էս է ունեցել, էն է ունեցել: Մենք փակում ենք էդ թեման: Որովհետև դա է խաղաղությունը»,-ասել է Փաշինյանը:

Մանրամասները՝ տեսանյութում։