Փորձում են ձևավորել վախի մթնոլորտ. «Միասնության թևեր»-ն ահազանգում է. ՏԵՍԱՆՅՈՒԹ

«Փորձում են ձևավորել վախի մթնոլորտ, սակայն մենք այստեղ ենք ասելու, որ դա նրանց մոտ չի ստացվելու»,- այս մասին հրավիրված հրատապ ասուլիսի ժամանակ ասաց «Միասնության թևեր» քաղաքական նախաձեռնության անդամ Լևոն Չուկակլյանը։ Նրա խոսքով՝ նախընտրական շրջանում ընտրական գործընթացների խոչընդոտման, անարդար մրցակցային պայմաններ են ստեղծվել.

«Օրեր առաջ Արմավիրի մեր գրասենյակում տեղի ունեցավ կամավորների հետ ճանաչողական հանդիպում։ Նշված երիտասարդները կամավորագրվել էին, որպեսզի, ըստ հայտարարության, միանան մեզ, գործունեություն ծավալեն և իրականացնեն կամավորական աշխատանքներ։ Մենք հանդիպման հետ կապված հրապարակեցինք լուսանկարներ, իսկ լուսանկարների հրապարակումից հետո տեղի ունեցավ այն, ինչը կոչվում է ժողովրդավարության հիմքերը խարխլել։ Նրանց լուսանկարները տարածքային կառավարման և տեղական մարմինների միջոցով ուղարկվեց նրանց ուսման վայրեր, ծնողների աշխատանքի վայրեր և բարեկամների, ընտանիք մտնելով, բարեկամների միջոցով, ընտանիքի անդամների միջոցով ճնշումների արդյունքում նրանց փորձում են վախեցնել, որպեսզի այլևս անձնավորված որևէ կապ չունենան մեզ հետ, ովքեր որ նախաձեռնել են «Միասնության թևեր» քաղաքական նախաձեռնության գործունեությունը հենց Արմավիրի մարզում և, իհարկե, չմասնակցեն մեր նախաձեռնություններին և քաղաքական գործընթացներին»,- իր խոսքում նշեց Չուկակլյանը։

Նրա համոզմամբ՝ այս ամենը խոսում է այն մասին, որ իշխանությունը վախեցած է.
«Վախի մթնոլորտը Հայաստանի Հանրապետությունում հաղթահարված է, և անգամ սպառնալիքների և տարատեսակ գործողությունների արդյունքում նրանք չեն հասնելու իրենց ուզածին»։