Քաղաքականություն
28.03.2026 | 19:23
Սաուդյան Արաբիայի արտաքին գործերի նախարար Ֆեյսալ բեն Ֆարհան Ալ Սաուդը, Թուրքիայի ԱԳ նախարար Հաքան Ֆիդանը և Եգիպտոսի ԱԳ նախարար Բադր Աբդել Աթին մարտի 29-30-ը կայցելեն Իսլամաբադ՝ Իրանի հարցով խորհրդակցություններ անցկացնելու և Մերձավոր Արևելքում լարվածության նվազեցման ուղղությամբ խորացված բանակցություններ վարելու համար։ Այս մասին շաբաթ օրը՝ մարտի 28-ին, X սոցիալական ցանցում հայտնել է Պակիստանի ԱԳ նախարար Իսհակ Դարը։
Նրա խոսքով՝ նախատեսվում է նաև արտաքին քաղաքական գերատեսչությունների ղեկավարների հանդիպումը Պակիստանի վարչապետ Շահբազ Շարիֆի հետ։
«Պակիստանը բարձր է գնահատում իր հարաբերությունները եղբայրական երկրների՝ Սաուդյան Արաբիայի, Թուրքիայի և Եգիպտոսի հետ։ Այցը հնարավորություն կտա ավելի ամրապնդել համագործակցությունն ու համակարգումը Պակիստանի և այս երկրների միջև փոխադարձ հետաքրքրություն ներկայացնող տարբեր ոլորտներում»,- ընդգծել է Իսհակ Դարը։
Վերջին շրջանում Պակիստանը հանդես է գալիս որպես միջնորդ Իրանի և ԱՄՆ-ի միջև։ Իսլամաբադը լավ հարաբերություններ ունի թե՛ Թեհրանի, թե՛ Պարսից ծոցի երկրների, ինչպես նաև Վաշինգտոնի հետ, նշում է AFP գործակալությունը։
