Նիկոլ Փաշինյանը գիտակցված քայքայում է ՀՀ-ում համերաշխությունը, առաջնորդվում է՝ «բաժանիր, որ տիրես» սկզբունքով․ Նինա Կարապետյանց․ ՏԵՍԱՆՅՈՒԹ

«Նժար» սահմանադրական շարժման համահիմնադիր Նինա Կարապետյանցը Factor TV-ին տված հարցազրույցում անդրադարձել է Սամվել Կարապետյանի կուսակցության ներկայացուցիչների հետ հանդիպմանը՝ նշելով, որ միասնական ցուցակով հանդես գալը քիչ հավանական է, սակայն համագործակցության եզրեր կարող են լինել նախընտրական և հետընտրական փուլերում՝ հատկապես ընտրախախտումների դեպքում։ Նա խորին մտահոգություն է հայտնել երկրում տիրող ատելության մթնոլորտի կապակցությամբ։

Խոսելով Սամվել Կարապետյանի քաղաքական ուժի հետ հնարավոր համագործակցության մասին՝ Կարապետյանցը նշել է. «Քննարկվել են տարբեր գործունեության, համագործակցության գուցե տարբեր մոդելներ, որտեղ մենք իսկապես ունենք շատ մեծ տարբերություններ։ Առանձին հարցերում ունենք մեծ տարբերություններ հայացքների մեջ, և հետևաբար մեկ թիմով հանդես գալը բավականին բարդ կլիներ։ Բայց նաև կան գործունեության, այսպես, նախ ընտրություններին ընդառաջ կամ ընտրություններից գուցե հետո գործողություններ, որոնք կարող են լինել նաև համատեղ, եթե… տարբեր եթեներ։ Եթե, օրինակ, ընտրությունները կեղծվեցին, եթե, օրինակ, ճնշումներ եղան, եթե, օրինակ, տարբեր-տարբեր գործիքակազմեր են քննարկվում»։

Նա հավելել է, որ չնայած գաղափարական տարբերություններին, որոշ դեպքերում համատեղ աշխատանքը հնարավոր է. «Այս տրամաբանության մեջ մեր տարաձայնությունները, մեր նախասիրությունները, մեր քաղաքական ուղղվածությունները մեզ չեն խանգարում, որովհետև եթե մարդիկ նպատակ ունեն ընտրությունները, օրինակ, առանց խախտումների ունենալու, եթե նպատակ ունեն հետընտրական պրոցեսներում խախտումներին համատեղ արձագանքելու, ես կարծում եմ՝ սա բավականին ողջամիտ է»։

Անդրադառնալով Սամվել Կարապետյանի՝ Ռուսաստանում կապիտալ կուտակած լինելու և հնարավոր ռուսական ազդեցության վերաբերյալ հարցին՝ Կարապետյանցը նշել է, որ իր մտավախությունները վերաբերում են բոլոր արտաքին միջամտություններին. «Ես մտավախություն ունեմ զուգահեռաբար, մի քանի մտավախություններ ունեմ։ Առհասարակ որևէ կողմի, որևէ այլ երկրի միջամտություն, ազդեցություն, լինի դա Իրան, Թուրքիա, Ադրբեջան, այո՛, Ռուսաստան, այո՛, Միացյալ Նահանգներ, տարբեր միջամտությունը մեր ներքին գործերին»։

Նրա խոսքով, Հայաստանն արդեն իսկ գտնվում է Ռուսաստանի խորը ազդեցության տակ. «Հայաստանը այսօր այնքան խորը, ես կասեի՝ խոր ինտիմ հարաբերությունների մեջ է Ռուսաստանի Դաշնության հետ, իսկ ի՞նչն է փոխվել։ Բազանե՞րն են հանել Հայաստանի տարածքից, տնտեսական կախվածությունից ենք կարողացել դուրս գալ, հարաբերություններն են դարձել… առևտրի տոկոսն է պակասել։ Ի՞նչն են արել, որ հիմա թեթևացրել են»։

Նինա Կարապետյանցը իր համոզմունքն է հայտնել, որ գործող իշխանության վերարտադրությունը կհանգեցնի բռնատիրության. «Ես խորին համոզմունք ունեմ, որ Նիկոլ Փաշինյանի վերարտադրությունից հետո մենք ստանալու ենք դիկտատուրա։ Շատ պարզ տրամաբանությամբ՝ որովհետև այն պահանջները, որը ներկայացնում է Ադրբեջանը և անում է բաց տեքստով, ցավալիորեն, տարիների ընթացքում մենք համոզվել ենք, որ այդ բոլոր պրոյեկտների հետևից Ադրբեջանը գնում է հետևողականորեն։ Եվ դա նշանակում է, որ եթե հայկական կողմը չկատարեց այդ պահանջները, անընդհատ սպառնալու են մեզ պատերազմով։ Նիկոլ Փաշինյանը վերարտադրվելու դեպքում ամեն անգամ գալու է, ասի՝ այ, եթե այս պահանջը չարեցիք, հետո՝ այս պահանջը… Որպեսզի իրականացնի այդ պրոյեկտներն էլ զուգահեռաբար, կարողանա իրականացնել, նրան պետք է ունենա այստեղ դիկտատուրա։ Դրա մասին ես ասում եմ անհիշելի թվերից»։

Մեկնաբանելով մետրոյում տեղի ունեցած միջադեպը՝ Կարապետյանցը դա համարել է ատելության խոսքի կուտակման հետևանք. «Ատելության խոսքը, ինքը կումուլատիվ էֆեկտ ունի, ինքը հավաքվում է, ինքը ձնագնդի նման հավաքվում է, և դրա դրսևորումները կարող են լինել ամենաանսպասելի դրսևորումները, ամենածանր։ Բոլոր իրավիճակներում մենք հասել ենք… ես կարծում եմ՝ դեռ գագաթնակետին դեռ չենք հասել, ցավոք»։

Նա ընդգծել է, որ ատելության խոսքի տարածումը դադարեցնելու առաջին քայլը պետք է անի իշխանությունը. «Պետք է մի պահ կանգ առնել։ Եթե իրենց համար իսկապես կարևոր է հանդարտությունը, հանգստությունը, համերաշխությունը պետության ներսում, իրենք պետք է առաջինը, որովհետև իրենք են իշխանությունը, որովհետև իրենց ձեռքում կան լծակներ, իրենք են բոլոր հարթակներից խոսում՝ Հ1-ից սկսած մինչև հարթուկ, իրենք են միացնում, իրենք են խոսում։ Հետևաբար, քայլն իրենց, իրենց ձեռքում պիտի լիներ»։

Հարցազրույցն ամբողջությամբ՝ տեսանյութում։

Ռոբերտ Անանյան