«Ռուսաստանն ուզում է դանդաղ առաջ տանել Հայաստանն առանց հայերի ծրագիրը». Ռուբեն Հախվերդյանը՝ ռուսերենը Հայաստանում պաշտոնական լեզու դարձնելու մասին

Ճանաչված երգիչ-երգահան Ռուբեն Հախվերդյանը factor.am-ի հետ զրույցում «անմտություն և տխմարություն» է համարում ՌԴ Պետդումայի նախագահ Վյաչեսլավ Վոլոդինի առաջարկը՝ ՀՀ-ում ռուսերենը պաշտոնական լեզու սահմանելու մասին:

«Ռուսաստանն ուզում է դանդաղ առաջ տանել Հայաստանն առանց հայերի ծրագիրը: Եթե մենք կորցնում ենք մեր լուզուն, մենք կորցնում ենք մեզ, որից հետո չես կարող գտնել քեզ, եթե կորցրիր»,- ասում է Հախվերդյանը՝ շարունակելով. «Երբ ուզում են մարդուն ոչնչացնել, առաջինը սպանում են ոգին: Մեր լեզուն մեր ոգին ա, հնչյունաբանությունը, մեր խոսքերը, մեր այբ-բեն-գիմ-ը և մեր ոսկեհատման օրենքով սարքած եկեղեցիները: Ռուսաց լեզուն պետական լեզու սարքելը անմտություն ա և տխմարություն: Եթե դու հայերեն դպրոց չես ավարտում, նույնիսկ վատ դպրոց, դու դառնում ես կիսահայ. ռուսերեն մտածում ես, հայերեն խոսում: Դա արդեն ոչնչացման առաջին քայլն ա: Նախ՝ եթե մենք անկախ պետություն ենք, ի՞նչ կապ ունի էստեղ ռուսը»:

Նշենք, որ հուլիսի 17-ին պաշտոնական այցով Ռուսաստանի Դաշնությունում գտնվող ՀՀ ԱԺ նախագահ Արա Բաբլոյանի հետ հանդիպման ժամանակ ՌԴ ԱԺ Պետդումայի նախագահ Վյաչեսլավ Վոլոդինն առաջարկել էր ՀՀ-ում ռուսերենն օրենքով ամրագրել որպես պաշտոնական լեզու՝ նշելով, որ այլ պետությունների վարորդական վկայականներով Ռուսաստանում աշխատելու սահմանափակում մտցնող օրենքի ընդունումը պայմանավորված է եղել երթևեկության անվտանգությամբ, քանի որ, նրա խոսքով, աշխատող վարորդները ռուսերեն չիմանալու հետևանքով չեն տիրապետում ՌԴ երթևեկության կանոններին, ինչպես նաև չեն կարողանում օգտվել նավիգացիոն համակարգերով աշխատող ռուսական ծրագրերից:

Մանրամասները դիտեք factor.am-ի հետ Ռուբեն Հախվերդյանի հարցազրույցում:

Մարինե Խառատյան