21.12.2025 | 19:02
ԱՄՆ ազգային հետախուզության ղեկավարն հերքել է Ռուսաստանի ծրագրերի մասին Reuters-ի տեղեկությունները
ՀՀԿ խորհրդի կազմը տասնյակներով լքում են. ովքե՞ր են նրանք
Քաղաքականություն
12.11.2018 | 15:38
Հայաստանի Հանրապետական կուսակցության խորհուրդը լքել է մոտ 30 հոգի: Այս տեղեկությունը Factor.am-ին փոխանցել էին ՀՀԿ-ի աղբյուրները:
Տեղեկությունը մեր զրույցում հաստատեց նաև ՀՀԿ կազմակերպչական հարցերով հանձնաժողովի նախագահ Ռուբեն Թադևոսյանը և ասաց, որ խոսքը 22 անդամի մասին է: Տարօրինակը, սակայն, այն է, որ Թադևոսյանը հրաժարվում է նշել այն անձանց անունները, որոնք լքել են ՀՀԿ խորհուրդը:
Մեր տեղեկություններով՝ խորհրդից հեռացել են բնապահպանության նախկին փոխնախարար Խաչիկ Հակոբյանը և աշխատանքի և սոցիալական հարցերի նախկին փոխնախարար Աշոտ Մարգարյանը:
ՀՀԿ խորհուրդը լքողների մասին տեղեկություններ հրաժարվեցին տալ նաև ՀՀԿ ղեկավար կազմի մյուս ներկայացուցիչները: Նրանք պնդում էին, որ դա Ռուբեն Թադևոսյանի պարտականությունն է, իսկ Թադևոսյանը հակադարձում էր, որ իր պարտականությունը չէ:
Factor.am-ը տեղեկություն ստացավ, որ ՀՀԿ խորհրդի նոյեմբերի 11-ին տեղի ունեցած նիստին ներկա չեն եղել բոլոր անդամները: Հատկապես աչքի է ընկել Տարոն Մարգարյանի և նախկին վարչապետ Կարեն Կարապետյանի բացակայությունը:
Ի դեպ, Երևանի նախկին քաղաքապետ Տարոն Մարգարյանը և նախկին վարչապետ Կարեն Կարապետյանը վերջին շրջանում՝ իշխանափոխությունից հետո, չեն ներկայանում ՀՀԿ ԳՄ նիստերին:
Տեղեկացանք նաև, որ Տարոն Մարգարյանը չի մասնակցելու արտահերթ ընտրություններին: Նա չի ցանկանում աչքի ընկնել, քանի որ առանց այն էլ կոռուպցիոն գարծարքներում իր անունն է շրջանառվում:
Հայկ Վարդանյան
