Թումանյանը՝ Թումանյան համայնքում առաջադրված միակ թեկնածու․ ՏԻՄ ընտրություններին մասնակցելու է միայն ՔՊ-ն

Լոռու մարզի Թումանյան խոշորացված համայնքի ավագանու՝ սեպտեմբերի 27-ին կայանալիք ընտրություններին մասնակցելու համար առաջադրվել է միայն «Քաղաքացիական պայմանագիր» կուսակցությունը։ Այս մասին տեղեկանում ենք ԿԸՀ կայքից։

Կուսակցությունն արդեն ներկայացրել է ընտրական ցուցակը, որը մինչև օգոստոսի 31-ը կհրապարակվի ԿԸՀ կայքում։ Կուսակցության, ինչպես նաև ավագանու անդամների թեկնածուների գույքի և եկամուտների հայտարարագրերը ԿԸՀ կներկայացվեն օգոստոսի 28-ից մինչև սեպտեմբերի 7-ը։

«Քաղաքացիական պայմանագիր» կուսակցության նախընտրական ցուցակը Թումանյան համայնքի ղեկավար Սուրեն Թումանյանը օգոստոսի 23-ին ներկայացրել է թիվ 24 ընտրատարածքային հանձնաժողով։

«Դե ինչ, նախընտրական քարոզարշավի շրջանակում լինելու ենք Թումանյան համայնքի բոլոր բնակավայրերում, բոլորիդ բակերում։ Սիրով կլսենք բոլորիդ կարծիքները, առաջարկություններն ու մտահոգությունները»,- իր ֆեյսբուքյան էջում գրել է համայնքի ղեկավարը։

Ուշագրավ է, որ Սուրեն Թումանյանը 2021 թվականին համայնքի ղեկավար է ընտրվել «Հանրապետություն» կուսակցության ցուցակով։

ԿԸՀ տվյալներով՝ Թումանյան համայնքում ընտրելու իրավունք ունի 4953 քաղաքացի։ Համայնքն ընդգրկում է 8 բնակավայր՝ Դսեղ, Չկալով, Քարինջ, Մարց, Լորուտ, Ահնիձոր, Շամուտ և Աթան։ ԿԸՀ-ից հայտնել են, որ այսօր կհրապարակվի նաև քվեաթերթիկի նմուշը։

Թումանյան խոշորացված համայնքի ավագանին իր աշխատանքը սկսել է 2021 թվականի դեկտեմբերի 23-ից, մինչդեռ ընտրությունները նշանակվել են դրանից երեք ամիս շուտ։ ԿԸՀ-ից այս հանգամանքին դեռ չեն արձագանքել՝ նշելով, որ ավելի ուշ կպարզաբանեն, թե ինչու է ընտրության օրը այդպես որոշվել։

Անի Թամրազյան