20.10.2026 | 21:49
Հոկտեմբերի 31-ից կգործարկվի կենսաչափական փաստաթղթերի ստացման նախագրանցման նոր համակարգը
Թուրքական ԱԹՍ-ն խախտել է Հունաստանի օդային տարածքը․ հունական F-16 կործանիչները որսացել են այն
Քաղաքականություն
28.08.2026 | 22:10
Հունաստանի ռազմաօդային ուժերը թուրքական անօդաչու թռչող սարք են որսացել այն բանից հետո, երբ Անկարան դժգոհություն է արտահայտել Հռոդոսում անօդաչու սարքերի բազա ստեղծելու Աթենքի մտադրությունների վերաբերյալ, գրում է Euronews-ը։
Հունաստանի ռազմաօդային ուժերն անհապաղ պատրաստության վիճակի են բերվել, երբ հայտնաբերվել է թուրքական անօդաչու թռչող սարք, որը մուտք է գործել Աթենքի թռիչքային տեղեկատվության գոտի և խախտել ազգային օդային տարածքը։
Ըստ տեղեկությունների՝ թուրքական անօդաչուն թռչում էր Սամոթրակիի և Լիմնոսի միջև ընկած ջրերի վրայով, ինչը հանգեցրել է հսկողության և որսման ընթացակարգերի անհապաղ ակտիվացման։
Հունաստանն արձագանքել է․ ռազմաօդային ուժերի F-16 երկու կործանիչ է օդ բարձրացել՝ թուրքական անօդաչուն հայտնաբերելու, նույնականացնելու և որսալու առաջադրանքով։
Հատկապես մտահոգություն է առաջացրել, որ թուրքական անօդաչուն մոտեցել է Ալեքսանդրուպոլիսի օդանավակայանի օդային միջանցքի վերջնամասին հարող գոտուն՝ այն պահին, երբ «Aegean» ավիաընկերության ուղևորատար ինքնաթիռը պատրաստվում էր թռիչքի։ Հաղորդվում է, որ Քաղաքացիական ավիացիայի վարչության և հունական կործանիչների համակարգված գործողությունները թույլ են տվել անօդաչու թռչող սարքը դուրս մղել՝ առանց ուղևորատար թռիչքի անվտանգությունը վտանգելու։ Սակայն, որպես նախազգուշական միջոց, ուղևորատար ինքնաթիռին հրահանգվել է հետևել այլ օդային միջանցքի և պահպանել ցածր բարձրություն մինչև միջադեպի գոտին լքելը։ Այնուհետև այն վերսկսել է իր բնականոն թռիչքը՝ ուղղվելով դեպի Էլեֆթերիոս Վենիզելոս օդանավակայան։
Նշվում է, որ այս միջադեպն ավելի մեծ նշանակություն է ստանում ժամանակի շնորհիվ՝ ընդամենը մի քանի ժամ անց այն բանից, երբ Թուրքիայի Պաշտպանության նախարարությունը նոր հայտարարություններ է արել Հունաստանի կողմից Հռոդոսում անօդաչու թռչող սարքերի բազա ստեղծելու հնարավորության մասին: Անկարան պնդում է, որ նման քայլը կարող է բացասաբար անդրադառնալ «Էգեյան ծովում խաղաղության և կայունության վրա», միաժամանակ, ակնարկելով «անհրաժեշտ միջոցներ» ձեռնարկելու մասին:
Հունաստանի իշխանությունները վերլուծում են՝ սա Թուրքիայի կողմից քաղաքական և ռազմական ազդակներ փոխանցելու համակարգված փո՞րձ է, թե՞ Էգեյան ծովում նրա վարքագծի ավելի լայն փոփոխության նշան։ Այն փաստը, որ թուրքական անօդաչու թռչող սարքը որսալու համար անհրաժեշտ է եղել F-16 կործանիչներ օդ բարձրացնել, մեծացնում է մտահոգությունը գործնականում սադրիչ գործողությունների պրակտիկային հնարավոր վերադարձի վերաբերյալ։ Աթենքը ուշադիր հետևում է Անկարայի հետագա քայլերին, ասվում է հրապարակման մեջ։
Թարգմանությունը՝ Էմմա Չոբանյանի
