Ադրբեջանի ընդդիմության բանտարկված առաջնորդը հուսով է, որ Վենսը Բաքվում կբարձրացնի մարդու իրավունքների, քաղբանտարկյալների հարցը

Ադրբեջանի  ընդդիմադիր Ժողովրդական ճակատ կուսակցության բանտարկված նախագահ Ալի Քերիմլին արձագանքել է ԱՄՆ փոխնախագահ Ջեյմս Վենսի՝ փետրվարին Ադրբեջան այցի մասին լուրերին։ Սոցիալական ցանցերում հրապարակված հայտարարության մեջ նա Վենսի այցը որակել է որպես «շատ կարևոր իրադարձություն»։

«Անկասկած, այս այցը, մի կողմից, կնպաստի Ադրբեջանի և Հայաստանի միջև խաղաղության ամրապնդմանը, իսկ մյուս կողմից՝ կարագացնի TRIPP երթուղու իրականացումը։ Միաժամանակ, սպասվում է, որ Ադրբեջանի և Միացյալ Նահանգների միջև հարաբերությունները կբարձրանան ռազմավարական գործընկերության մակարդակի, ինչը ես գնահատում եմ։ Մեր կուսակցական ծրագիրը նաև նախատեսում է, որ Ադրբեջանը և Միացյալ Նահանգները լինեն ոչ միայն ռազմավարական գործընկերներ, այլև դաշնակիցներ»,- նշել է  նա։

Սակայն Քերիմլին ափսոսանք է հայտնել, որ Վենսի այցը համընկել է Ադրբեջանում «բռնաճնշումների գագաթնակետի» շրջանի հետ։

«Մինչև 340 հասարակական և քաղաքական ակտիվիստներ ձերբակալվել են իրենց քաղաքական դիրքորոշումների համար, և ռեժիմը փորձում է ոչնչացնել երկրում ազատ մամուլը, քաղաքացիական հասարակությունը և ընդդիմությունը։ Հետևաբար, նման  այցի ընթացքում ես շատ հույս ունեմ, որ Վենսը Իլհամ Ալիևի հետ հանդիպման ժամանակ կքննարկի Ադրբեջանում մարդու իրավունքների և ազատությունների ներկայիս վիճակը, ժողովրդավարական ինստիտուտների վիճակը և ընդհանուր առմամբ երկրում ժողովրդավարական բացության հարցերը»,- հավելել է նա։

Հունվարի 24-ին ԱՄՆ նախագահ Դոնալդ Թրամփը հայտարարել է, որ փոխնախագահ Ջեյմս Վենսը փետրվարին պաշտոնական այցով կայցելի Ադրբեջան և Հայաստան։

Թարգմանությունը՝ Էմմա Չոբանյանի