Կեղծ դիտորդների նպատակը թերի ընտրությունները լեգիտիմացնելն է, կամ նսեմացնել ազատ ընտրությունները․ Ջուլհակյան․ ՏԵՍԱՆՅՈՒԹ

Ընտրական օրենսգիրք սահմանադրական օրենքում կատարվող փոփոխությունների և լրացումների մասին նախագիծն առնչվում է դիտորդական առաքելությունների քաղաքական չեզոքության արդեն գործող կանոնի հստակեցմանը և համապատասխան մեխանիզմների հստակեցմանը: Այս մասին ԱԺ արտահերթ նիստի ընթացքում նշեց ՔՊ-ական պատգամավոր Արուսյակ Ջուլհակյանը։

«Դիտորդները պարտավոր են չմիջամտել ընտրական գործընթացին և չարտահայտել քաղաքական աջակցություն կամ ընդդիմություն:

Կողմնակալ կամ կեղծ դիտորդությունը, ըստ էության, քաղաքական գործունեության ձև է, որն ուղղված է քաղաքական գործիչների և քաղաքական ուժերի շահերն առաջ մղելուն, ընտրական գործընթացների ընթացքում վստահելի դիտորդության իմիտացիայի միջոցով: Ի տարբերություն անկախ և անկողմնակալ դիտորդների, կեղծ դիտորդական խմբերը ցուցաբերում են նվազ թափանցիկություն, անտեսում են միջազգային չափանիշները: Դրանք հաճախ չունեն ընտրությունների դիտարկման կուռ մեթոդաբանություն, չեն հրապարակում դիտորդական զեկույցներ կամ տրամադրում են ձևական ու կողմնակալ զեկույցներ»,-նշեց նա:

Ջուլհակյանի խոսքով՝ Հայաստանի Հանրապետության օրենսդրությունը, մասնավորապես Ընտրական օրենսգիրքը, նույնպես սահմանում է, որ դիտորդը պետք է լինի անկողմնակալ և չեզոք, իսկ դիտորդական առաքելությունները չպետք է աջակցեն քաղաքական կուսակցություններին, ընտրություններին մասնակցող կուսակցություններին, սակայն բավարար մեխանիզմներ չի սահմանում, ինչ է տեղի ունենում, երբ այս կանոնը խախտվում է։

«Այս նախագծի հիմնական նպատակը հենց այդ մեխանիզմների սահմանումն է: Այսինքն, արդեն գործող կանոնի հստակեցումը և արդեն առկա մեխանիզմների ընդլայնումը, որպեսզի այս կանոնները կարողանան դառնալ իրապես գործուն»,-ասաց նա։

Մանրամասները՝ տեսանյութում։