06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հրատապ մեկ անձից գնումները 2025-ին ավելացել են
16.01.2026 | 17:45
2025 թվականին Հայաստանի պետական մարմինները ոչ մրցակցային՝ մեկ անձից գնման ընթացակարգով 2%-ով պակաս գնում են իրականացրել, քան 2024-ին։ Պետական գնումների էլեկտրոնային Armeps համակարգի տվյալների ուսումնասիրությամբ Factor.am-ը պարզել է, որ ի տարբերություն մեկ անձից գնումների, հրատապ մեկ անձից գնումների ծավալն անցած տարի ավելացել է 3 %-ով։
Սա այն դեպքում, երբ 2024 թվականին Լոռիում տեղի ունեցած ջրհեղեղի պատճառով դրա հետևանքների վերացման նպատակով բազմաթիվ գնումներ Կառավարությունը հրատապ մեկ անձից էր կատարել։
Այսինքն՝ տրամաբանությունը հուշում է, որ 2025-ին 2024-ի համեմատ հրատապ մեկ անձից գնումները պետք է զգալի նվազ լինեին, ոչ թե ավելի։
Ընդ որում՝ հրատապ կարգով գնումներ են իրականցվել այնպիսի աշխատանքների համար, որոնց դեպքում պետք էր մրցույթ հայտարարել։ Օրինակ՝ ամենամեծ հրատապ գնումն իրականացրել է Երևանի քաղաքապետարանը՝ 4 մլրդ 750 մլն դրամով «Զովեր Քնսթրաքշն» ընկերությանը պատվիրելով կառուցել Ալբերտ Ազարյանի անվան մարզադպրոցի նոր մարզաբազան։
Այս ընկերության ղեկավարն ու փոխկապակցված մի քանի անձինք, հիշեցնենք, 2023-ին «Քաղաքացիական պայմանագիր» կուսակցությանը խոշոր նվիրատվություններ էին արել։
Մեկ անձ ընթացակարգով ամենամեծ ծավալի գնումն անցած տարի կատարել է Հանրային հեռարձակողի խորհուրդը՝ 6 մլրդ 569 մլն դրամով «Հայաստանի հանրային հեռուստաընկերություն» ՓԲԸ-ից ձեռք բերելով հեռուստատեսային արտադրանքի հետ կապված ծառայություններ։
Գայանե Խաչատրյան
