18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Նարեկ Սամսոնյանը չի պահվում պատժախցային ռեժիմով․ ՔԿԾ
Քաղաքականություն
11.01.2026 | 17:07
Ըստ օրենքի՝ հացադուլ հայտարարած ազատազրկված անձը տեղափոխվում է առանձնացված խուց։ Այս մասին Factor TV-ի հարցմանն ի պատասխան հայտնեցին Քրեակատարողական ծառայությունից՝ անդրադառնալով «Իմնեմնիմի» պոդքաստի համահեղինակ, հացադուլ հայտարարած Նարեկ Սամսոնյանին պատժախուց տեղափոխելու վերաբերյալ փաստաբան Ռուբեն Մելիքյանի հայտարարությանը։
Փաստաբանի խոսքով՝ Նարեկ Սամսոնյանին տեղափոխել են պատժախուց («կարցեր»), քանի որ ՔԿՀ-ում բացակայել է հացադուլ անցկացնելու համար նախատեսված մեկ այլ խուց։
««Արմավիր» քրեակատարողական հիմնարկի պատժախցային մասնաշենքում առկա են առանձնացված խցեր, որոնք իրենց պայմաններով չեն տարբերվում մյուս խցերից։
Կալանավորված անձ Նարեկ Սամսոնյանը չի պահվում պատժախցային ռեժիմով․ նա գտնվում է սովորական ռեժիմում, և ապահովվում է նրա՝ առանձին հացադուլ իրականացնելու իրավունքը»,-նշեցին ՔԿԾ-ից։
Հիշեցնենք՝ հունվարի 9-ին հայտնի դարձավ, որ «Իմնեմնիմի» պոդքաստի համահեղինակներ և վարողներ Վազգեն Սաղաթելյանի ու Նարեկ Սամսոնյանի կալանքի ժամկետը 3 ամսով երկարաձգվել է։
Դատարանի որոշումից հետո Նարեկ Սամսոնյանը հայտարարել է, որ անժամկետ հացադուլ է սկսում, իր խոսքով, «իրավական խայտառակությունը դադարեցնելու» պահանջով։
Եվգենյա Համբարձումյան
