30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Վազգեն Սաղաթելյանի ու Նարեկ Սամսոնյանի կալանքը 3 ամսով երկարաձգվեց․ Սամսոնյանը հացադուլ է հայտարարել
Հասարակություն
09.01.2026 | 18:06
«Իմնեմնիմի» պոդքաստի համահեղինակներ և վարողներ Վազգեն Սաղաթելյանի ու Նարեկ Սամսոնյանի կալանքի ժամկետը 3 ամսով երկարաձգվել է։ Առաջին դատական նիստի ժամանակ հանրային մեղադրող Հայկ Ավետյանն է միջնորդել նրանց կալանքը երկարաձգել։ Դատարանը բավարարել է միջնորդությունները։
Դատարանի որոշումից հետո Նարեկ Սամսոնյանը հայտարարել է, որ անժամկետ հացադուլ է սկսում, իր խոսքով, «իրավական խայտառակությունը դադարեցնելու» պահանջով։
Նարեկ Սամսոնյանն ու Վազգեն Սաղաթելյանը կալանավորվել էին անցյալ տարվա նոյեմբերի 13-ի առավոտյան իրենց բնակարաններում և «Անտիֆեյքի» գրասենյակում խուզարկությունից հետո։
Նարեկ Սամսոնյանի և Վազգեն Սաղաթելյանի դեմ քրեական վարույթ է նախաձեռնվել ԱԺ նախագահ Ալեն Սիմոնյանի հաղորդման հիման վրա։ Վարույթի նախաձեռնման առիթը Վազգեն Սաղաթելյանի ֆեյսբուքյան գրառումներից մեկն է, որում վիրավորական արտահայտություններ են հնչեցվել ԱԺ նախագահ Ալեն Սիմոնյանի և վարչապետ Նիկոլ Փաշինյանի հասցեին: Ապա Սամսոնյանն ու Սաղաթելյանը թեման շարունակել են նաև պոդքասթի շրջանակներում:
Նրանք մեղադրվում են «Խուլիգանություն՝ հաղորդակցման միջոցների օգտագործմամբ» հոդվածի հատկանիշներով։
Անի Թամրազյան
