03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Թրամփը հայտարարել է, որ Վենեսուելան ԱՄՆ-ին 30-ից 50 միլիոն բարել նավթ «կփոխանցի»
Քաղաքականություն
07.01.2026 | 12:11
ԱՄՆ նախագահ Դոնալդ Թրամփը հայտարարել է, որ Վենեսուելան Միացյալ Նահանգներին «կփոխանցի» 30-ից 50 միլիոն բարել նավթ, որը կվաճառվի շուկայական գներով, իսկ ստացված գումարը կվերահսկվի Միացյալ Նահանգների կողմից, գրում է CNN-ը։
«Վենեսուելայի ժամանակավոր իշխանությունները կվերադարձնեն պատժամիջոցների տակ գտնվող նավթը»,- գրել է Թրամփը Truth Social-ում։
Նա նշել է, թե ստացված եկամուտն ԱՄՆ-ն կօգտագործի «Վենեսուելայի և Միացյալ Նահանգների ժողովուրդների օգտին»։
Էներգետիկայի նախարար Քրիս Ռայթին հանձնարարվել է «անհապաղ իրականացնել այս ծրագիրը»։
Սպիտակ տան հետ վարչակազմի բարձրաստիճան պաշտոնյան անանունության պայմանով CNN-ին ասել է, որ նավթն արդեն արդյունահանվել է։ Դրա մեծ մասը ներկայում նավերի վրա է, և այժմ կուղարկվի Մեքսիկական ծոցի ԱՄՆ օբյեկտներ՝ վերամշակման համար։
Ըստ հրապարակման՝ Վենեսուելայից մատակարարվող վառելիքի քանակը կարող է փոքր-ինչ իջեցնել նավթի գները, սակայն, հավանաբար, էապես չի նվազեցնի բենզինի գները ամերիկացի սպառողների համար։
ԱՄՆ նավթի գինը նվազել է շուրջ 1 դոլարով մեկ բարելի դիմաց կամ մի փոքր պակաս, քան 2%-ով՝ հասնելով 56 դոլարի, անմիջապես այն բանից հետո, երբ Թրամփը Truth Social-ում հայտարարություն է արել։
Մինչև 50 միլիոն բարել նավթի վաճառքը կարող է բավականին մեծ եկամուտ ապահովել. Վենեսուելական նավթը ներկայում վաճառվում է 55 դոլարով՝ մեկ բարելի համար, ուստի եթե Միացյալ Նահանգները կարողանա գտնել շուկայական գինը վճարելու պատրաստ գնորդներ, ապա վաճառքից կարող է ստանալ 1,65-ից մինչև 2,75 միլիարդ դոլար։ Անհասկանալի է, սակայն, թե ինչ ժամանակահատվածում Վենեսուելան նավթը կհանձնի Միացյալ Նահանգներին։ Վարչակազմի բարձրաստիճան պաշտոնյան ասել է, որ փոխանցումը տեղի կունենա արագ, քանի որ Վենեսուելայի հում նավթը շատ ծանր է, ինչը նշանակում է, որ այն երկար չի կարող պահվել։
Միաժամանակ, Lipow Oil Associates-ի նախագահ Էնդրյու Լիփոուն սոցցանցում գրառմամբ նշել է, որ նավթը չի փչանում, եթե որոշակի ժամանակահատվածում չի վերամշակվում։
«Այն հարյուր միլիոնավոր տարիներ գտնվել է հողի տակ։ Իրականում, ռազմավարական նավթային պաշարների նավթի մեծ մասը գոյություն ունի տասնամյակներ շարունակ»,- գրել է նա։
Թարգմանությունը՝ Էմմա Չոբանյանի
