09.06.2026 | 00:17
Մարկո Ռուբիոն շնորհավորել է Փաշինյանին
Զելենսկին Թրամփին առաջարկել է Ուկրաինային 30-50 տարով անվտանգության երաշխիքներ տրամադրել
Քաղաքականություն
29.12.2025 | 16:43
Ուկրաինայի նախագահ Վլադիմիր Զելենսկին ԱՄՆ նախագահ Դոնալդ Թրամփին առաջարկել է Ուկրաինային տրամադրել անվտանգության երաշխիքներ՝ 30-50 տարի ժամկետով։ ՌԲԿ-Ուկրաինայի հաղորդմամբ՝ Զելենսկին այս մասին ասել է լրատվամիջոցների հարցերին ի պատասխան։
«Երեկ մենք ԱՄՆ նախագահի հետ հաստատեցինք, որ ԱՄՆ-ից կունենանք անվտանգության ամուր երաշխիքներ։ Իրոք, սա հավերժ չէ. փաստաթղթերում նշված է, որ այն 15 տարի է՝ այդ անվտանգության երաշխիքները երկարաձգելու հնարավորությամբ»,- նշել է Զելենսկին։
Նրա խոսքով՝ ինքը բարձրացրել է երաշխիքների ավելի երկար ժամկետի հարցը։
«Ես նրան ասացի, որ մենք արդեն պատերազմի մեջ ենք, և դա շարունակվում է գրեթե 15 տարի։ Հետևաբար, ես շատ կցանկանայի, որ երաշխիքներն ավելի երկար լինեին։ Եվ ես նրան ասացի, որ մենք շատ կցանկանայինք քննարկել 30, 40, 50 տարվա հնարավորությունը։ Եվ դա կլինի նախագահ Թրամփի պատմական որոշումը։ Նախագահն ասաց, որ կմտածի այդ մասին»,- հավելել է նա։
Զելենսկին նաև լրագրողներին ասել է, որ եթե Ռուսաստանը հրաժարվի համաձայնագրից և շարունակի պատերազմը, Միացյալ Նահանգները, Եվրոպայի հետ միասին, կշարունակի աջակցել Ուկրաինային։
Միևնույն ժամանակ, Զելենսկին կարծում է, որ Ուկրաինայի և Միացյալ Նահանգների միջև վերջերս համաձայնեցված 20 կետանոց ծրագիրը պետք է ամրագրվի հանրաքվեով, քանի որ սա նման որոշման օրինականացման ամենաուժեղ ձևն է՝ միլիոնավոր քաղաքացիների կամքի արտահայտման միջոցով։
Հիշեցնենք, որ դեկտեմբերի 28-ին Ուկրաինայի նախագահ Վլադիմիր Զելենսկին ժամանել էր Ֆլորիդա, որտեղ հանդիպել է ԱՄՆ նախագահ Դոնալդ Թրամփի հետ Մար-ա-Լագոյի նրա անձնական նստավայրում։
Թարգմանությունը՝ Էմմա Չոբանյանի
