08.03.2026 | 16:14
ԱՄԷ-ն առաջին անգամ հարվածել է Իրանի տարածքին․ իսրայելական ԶԼՄ-ներ
Պուտինը և Զելենսկին կարող են հինգ տարվա ընթացքում առաջին անգամ հեռախոսազրույց ունենալ․ աղբյուր
Քաղաքականություն
29.12.2025 | 12:40
Ուկրաինայի նախագահ Վլադիմիր Զելենսկին կարող է հեռախոսազրույց ունենալ ՌԴ ղեկավար Վլադիմիր Պուտինի հետ՝ ավելի քան հինգ տարվա ընթացքում առաջին անգամ։ Այս մասին հաղորդում է ՌԲԿ Ուկրաինան՝ հղում անելով Fox News-ին։
Աղբյուրի փոխանցմամբ՝ Թրամփի և Զելենսկիի միջև Մար-ա-Լագոյում կայացած հանդիպումը կարող է նպաստել դրան։
«Դոնալդ Թրամփի և Վլադիմիր Զելենսկիի միջև կիրակի կայացած բանակցությունները կարող են ուղի հանդիսանալ Զելենսկիի և Վլադիմիր Պուտինի միջև հինգ տարուց ավելի դադարից հետո առաջին հեռախոսազրույցի համար»,- գրում է լրատվամիջոցը՝ հղում անելով քննարկումներին ծանոթ աղբյուրին։
Չնայած Ֆլորիդայի հանդիպումը ներկայացվեց որպես Թրամփի գլխավորած խաղաղության ջանքերի առաջընթաց քայլ, աղբյուրը հավելել է, որ Զելենսկիի և Պուտինի միջև ուղիղ հեռախոսազրույցի ապահովումը կլիներ ԱՄՆ նախագահի «դիվանագիտական հաղթանակը»։ Նա նաև նշել է, որ եթե Պուտինը երեկ խոսեր, դա կլիներ խաղաղության գործընթացի ամենամեծ նվաճումը։
«Եթե Պուտինը միանար հեռախոսազանգին կիրակի, դա կլիներ մեծ նվաճում խաղաղության բանակցությունների նախապատրաստման գործում և խաղաղության գործընթացի առաջին իրական քայլը։ Դա կլիներ նախագահ Թրամփի դիվանագիտական հաղթանակը»,- ասել է աղբյուրը։
Ըստ նրա՝ Թրամփը, կարծես, ամենահաջողակ միջնորդն է, քանի որ «Պուտինն ու Զելենսկին միմյանց ընկալում են հուզականորեն, և դա մարտահրավեր է»։
Աղբյուրը նաև մեկնաբանել է երեկվա բանակցությունները։ Նրա խոսքով՝ քննարկումները կենտրոնացած են եղել ԱՄՆ-ի կողմից աջակցվող 20 կետանոց խաղաղության ծրագրի շուրջ, որը մշակվել է մի քանի շաբաթ տևած բանակցություններից հետո։ Փաստաթուղթը կպահանջի փոխզիջումներ և՛ Կիևից, և՛ Մոսկվայից՝ «Զելենսկիին ներգրավելու և, հնարավոր է, նրա հետ ուղիղ բանակցություններ վարելու համար»։ Դա, կարծես, վերաբերում է ռուսական կողմի կամ անձամբ Պուտինի հետ ուղիղ բանակցություններին։
«Միակ դժվարությունն այն է, որ Պուտինը հրաժարվել է խոսել Զելենսկիի հետ 2020 թվականի հուլիսից ի վեր, երբ նրանք քննարկել են Վագների սկանդալը և Վագների հետ կապված ռուս զինյալներին ձերբակալելու ձախողված գործողությունը։ Այդ ժամանակից ի վեր Զելենսկին բազմիցս փորձել է խոսել Պուտինի հետ, բայց նա հրաժարվել է։ Մինչև 2020 թվականի այդ պահը Զելենսկու և Պուտինի միջև զրույցները երբեք բարեկամական չեն եղել, նրանց միջև միշտ լարվածության զգացում է եղել»,- ասել է աղբյուրը։
Հիշեցնենք, որ դեկտեմբերի 28-ին Ուկրաինայի նախագահ Վլադիմիր Զելենսկին ժամանել է Ֆլորիդա, որտեղ հանդիպել է ԱՄՆ նախագահ Դոնալդ Թրամփի հետ Մար-ա-Լագոյի նրա անձնական նստավայրում։
Թարգմանությունը՝ Էմմա Չոբանյանի
