10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
35 տարին լրացած մեկ քաղաքացի դիմել է զինկոմիսարիատ՝ ցանկություն հայտնելով զորակոչվելու
Հասարակություն
27.12.2025 | 11:55
2026 թվականի հունվարի 9-ից մինչև հունվարի 31-ը Զինված ուժերի պահեստազորի սպայական կազմում հաշվառված՝ մինչև 35 տարեկան արական սեռի բժիշկ-մասնագետների պարտադիր զինվորական ծառայության զորակոչ կհայտարարվի՝ 2 տարի ժամկետով։
Ավելի վաղ, օրինակ, բժշկական համալսարանի ուսանողները ուսման տարկետում էին ստանում, ուսման հետ զինվորական պատրաստություն էին անցնում, ավարտելուց հետո դառնում էին պահեստազորի սպա և հետո զորակոչվում ծառայության՝ որպես սպա։
2017 թվականից այս համակարգը փոխվել է։ Հիմա ուսման տարկետում տրվում է հիմնականում «Պատիվ ունեմ» ծրագրով, որն ավարտելուց հետո ծառայությունը լրիվ այլ կերպ է անցնում։
Նախկին տարկետման համակարգով ԵՊԲՀ ընդունված և ավարտած քաղաքացիներին մինչև 2023 թվականը պահեստազորի սպայական կազմի պարտադիր զինվորական ծառայության զորակոչելով աստիճանաբար նվազեց նման կարգավիճակ ունեցող քաղաքացիների քանակը, որի արդյունքում 2023 և 2024 թվականներին զորակոչի ենթակա անձանց բացակայության պատճառով պահեստազորի սպայական կազմի պարտադիր զինվորական ծառայության զորակոչեր չեն հայտարարվել: Ներկայումս առկա է նման կարգավիճակ ունեցող մեկ քաղաքացի (մինչև 35 տարեկան), որը նախկինում խուսափել է զորակոչից և դիմել է զորակոչվելու համար:
«Ներկայումս 35 տարին լրացած մեկ քաղաքացի դիմել է զինկոմիսարիատ՝ ցանկություն հայտնելով զորակոչվելու: Կառավարության որոշմամբ պահեստազորի սպայական կազմի պարտադիր զինվորական ծառայության զորակոչ հայտարարվելուց հետո հնարավոր է նաև նման կարգավիճակ ունեցող այլ սպաների ներգրավում զորակոչային միջոցառումներին, որի կապակցությամբ նպատակահարմար է զորակոչի թվաքանակը սահմանել մինչև 10 անձ»,-նշվում է հիմնավորման մեջ։
Եվգենյա Համբարձումյան
