Ամեն ինչ անելու ենք, որ ամիսների ընթացքում կալանքների ավտոմատ մակագրման հարցը լուծվի․ Սրբուհի Գալյան

«Ես խնդիր եմ համարում, որ մակագրման ավտոմատ համակարգ մինչդատական վարույթի փուլում չկա և վստահեցնում եմ, որ այս մասով քննարկումներ ենք ունեցել մեր դատական իշխանության գործընկերների հետ։ Ամեն ինչ անելու ենք, որ ամիսների ընթացքում այս խնդիրը լուծվի։ Երբ ունենանք կալանքների միջնորդությունների ավտոմատ մակագրման համակարգ, կալանքների մակագրման հետ կապված բոլոր հնարավոր մտահոգությունները դուրս կգան օրակարգից»,- այս մասին Factor TV-ի հետ հարցազրույցում ասաց արդարադատության նախարար Սրբուհի Գալյանը։

Նշենք, որ մինչդատական վարույթի փուլում կալանքներն ու դատարանի քննությանը ենթակա այլ հարցեր դատավորներին մակագրվում են ձեռքով: Բարձրագույն դատական խորհրդի նախկին նախագահ Կարեն Անդրեասյանը վստահեցնում էր․ 2024-ի տարեվերջին կալանքների հարցերի քննությունն արդեն համակարգչով կմակագրվի, բայց այս խոստումից ավելի քան 1 տարի անց այն չի իրականացվել։ Սրբուհի Գալյանից հետաքրքրվեցինք՝ կոնկրետ քանի՞ ամիս անց կունենանք մինչդատական վարույթի նկատմամբ դատական հսկողության գործերի ավտոմատ մակագրման համակարգ, ինչին ի պատասխան նախարարն ասաց․

«Ցավոք սրտի ՝ ինձ իմ տեխնիկական ոլորտի գիտելիքները չեն բավարարում կոնկրետ ժամկետ նշելու համար, ես փոխանցում եմ այն ժամկետը, որն ասվել է տեխնիկական համապատասխան գիտելիքներ ունեցող անձանց թիմի կողմից, և ես ոչ մի հիմք չունեմ չվստահելու այդ դիրքորոշմանը»,- ասաց Գալյանը։

Հարցազրույցն ամբողջությամբ կարող եք դիտել այսօր Factor TV-ի յութուբյան ալիքում այսօր ժամը 20։00-ին։

Արաքս Մամուլյան