Երկիրը պետք է ունենա հինգերորդ, նոր առաջնորդ, նոր ազգանվամբ․ Նարեկ Կարապետյան

Այսօր «Մեր ձևով» ժողովրդական շարժման տարեկան ամփոփիչ հաշվետու ժողովն էր, որին հաջորդեց շարժման համակարգող, գործարար Սամվել Կարապետյանի եղբորորդի Նարեկ Կարապետյանի ասուլիսը։ «Առաջնորդի հետ կապված ես կրկնում եմ մեր այն կարծիքը և այն հայտարարությունը, որ առաջնորդը կլինի ընդունելի և ընկալելի մեր հանրության համար։ Իսկ անունը մենք կհրապարակենք քաղաքական ուժի ստեղծման հայտարարության օրը։ Քաղաքական ուժի անունը և նաև քաղաքական թիմի վարչապետի թեկնածուի անունը մենք կհրապարակենք տարվա սկզբին՝ քաղաքական ուժի ստեղծման համագումարի ժամանակ»,- հայտարարեց նա։

Նարեկ Կարապետյանի խոսքով՝ եթե հաջորդ ընտրություններում հաղթի նախկինում երկրի ղեկավարի պաշտոնը զբաղեցրածներից որևէ մեկը, ապա երկրում միասնության հարցը հարցականի տակ կլինի։

«Մենք չենք կարող հասարակական համերաշխության հասնել մեր երկիրը ղեկավարած չորս ղեկավարներից յուրաքանչյուրի պաշտոնը ստանձնելու դեպքում։ Մեր երկրին պետք է նոր ղեկավար, ով հասարակական հակակրանքի բեռ չունի։

Մենք գնահատական չենք ուզենա տանք, թող պատմությունը գնահատական տա՝ ով ինչ է արել և ով ինչ չի արել, սակայն երկիրը պետք է ունենա հինգերորդ, նոր առաջնորդ, նոր ազգանվամբ»,- ասաց նա։

Ավելի վաղ նմանատիպ հայտարարություն էր արել նաև «Միասնության թևեր» ուժի առաջնորդ Արման Թաթոյանը։ «Թեև ընտրություններին մասնակցելը պաշտոնաթող կամ նախկին նախագահների իրավունքն է, բայց եթե նրանք ուզում են` Փաշինյանը հեռանա, պետք է ձեռնպահ մնան դրանից»,- ասել էր նա։

Եվգենյա Համբարձումյան