Ինչ է մարդկանց թրաֆիքինգն ու շահագործումը․ քննարկում ՄԻՊ գրասենյակում

Ինչ է թրաֆիքինգը, ինչպես արձագանքել դրան և ինչպես լուսաբանել դրանց դրսևորումները․ Մարդու իրավունքների պաշտպանի նախաձեռնությամբ և Ռաուլ Վալենբերգի ինստիտուտի երևանյան գրասենյակի աջակցությամբ ՄԻՊ գրասենյակում այսօր լրագրողների, հանրային պաշտպանի գրասենյակի և ՄԻՊ աշխատակազմի ներկայացուցիչների համար կազմակերպվել էր դասընթաց։

«Շատ եմ կարևորում ոչ միայն առանձին-առանձին խմբերով տարբեր հարցերի քննարկումները, այլ նաև հարցադրումների համատեղ քննարկումները, որովհետև համատեղ քննարկումների արդյունքում, երբ մեզանից յուրաքանչյուրը կիսվում է իր ոլորտում եղած խնդիրներով, հնարավորություն ենք ունենում շատ ավելի մեծ պատկերացում ունենալու խնդիրների մասին, և դրանք ավելի ճիշտ հասցեագրելու»,- բացման խոսքում նշեց Անահիտ Մանասյանը։

Ռաուլ Վալենբերգի ինստիտուտի երևանյան գրասենյակի տնօրեն Լաուրա Միլնը բացման խոսքում անդրադարձավ թրաֆիքինգի լատենտայնությանը։

«Սովորաբար թրաֆիքինգը բացահայտ չէ, այն թաքնված է, և է՛լ ավելի է դժվարացնում այդ գործերի քննությունը»,- ասաց Միլնը։

ՄԻՊ աշխատակազմի հետազոտական փորձագիտական և կրթական կենտրոնի ղեկավար Ժաննա Հակոբյանը խոսեց տուժողներին գործուն աջակցություն տրամադրելու մեխանիզմների բացակայության, գերատեսչությունների միջև ինֆորմացիայի փոխանակման և այլ խնդիրների մասին։

Ըստ Հակոբյանի՝ եղել են դեպքեր, երբ աջակցության կարիք ունեցող երեխան մի համայնքից տեղափոխվել է մյուսը և, փաստացի, դուրս մնացել պետության ուշադրության կենտրոնից։

Ռաուլ Վալենբերգի ինստիտուտի փորձագետ Սերգեյ Ղազինյանը նշեց, որ անձը կարող է քրեական վարույթի շրջանակներում չլինել տուժող, բայց համարվել թրաֆիքինգի զոհ։ Նա խոսեց մարդկանց թրաֆիքինգի և շահագործման ինստիտուցիոնալ կառուցակարգերի, Հայաստանում միջազգային և եվրոպական չափանիշների ապահովման, միգրացիայի և թրաֆքինգի տարանջատման մասին։ Ղազինյանը նշեց, որ պետությունը պետք է վերացնի անձի խոցելիությունը, որպեսզնի նա չհայտնվի անօգնական վիճակում։

Արաքս Մամուլյան