09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Ադրբեջանը կասկածներ ունի Գազայի միջազգային ուժերին միանալու հարցում․ MEE
Քաղաքականություն
23.12.2025 | 22:24
Ադրբեջանցի բարձրաստիճան պաշտոնյան Բաքվի կասկածներն է հայտնել Գազայում տեղակայվելիք միջազգային ուժերին միանալու վերաբերյալ։ Ադրբեջանի նախագահի խորհրդական Հիքմեթ Հաջիևը հայտարարել է, որ Բաքվի համար դժվար կլինի մասնակցել ԱՄՆ-ի միջնորդությամբ հրադադարի ծրագրի շրջանակում տեղակայվելիք ուժերին՝ հղում անելով մանդատի շրջանակի հետ կապված խնդիրներին, գրում է Middle East eye-ը։
Nikkei-ին տված հարցազրույցում պաշտոնյան նշել է, որ Վաշինգտոնը դիմել է Բաքվին՝ ադրբեջանական ուժերը ներառելու համար այն ուժերում, որոնք նրանք անվանում են «Միջազգային կայունացման ուժեր»։
«Վերջնական որոշում դեռևս չի կայացվել»,- ասել է Հաջիևը։
ՄԱԿ-ի Անվտանգության խորհուրդն անցյալ ամիս հաստատել է ուժեր ստեղծելու մասին բանաձևը՝ ստանալով Թուրքիայի, Կատարի, Եգիպտոսի, Միացյալ Արաբական Էմիրությունների, Սաուդյան Արաբիայի, Ինդոնեզիայի, Պակիստանի և Հորդանանի պաշտոնական աջակցությունը։ Սակայն այդ ժամանակից ի վեր քիչ առաջընթաց է գրանցվել։
Հաջիևը մտահոգություն է հայտնել, որ Անվտանգության խորհրդի բանաձևը «չի անդրադառնում Գազայում գործողությունների կոնկրետ կանոններին, գործողությունների եղանակներին և առաքելության մանդատի շրջանակին վերաբերող հարցերին»։ Նա նաև նշել է, որ Ադրբեջանը մինչև 2023 թվականը կռվել է հարևան Հայաստանի դեմ, և դժվար կլինի համոզել նրա ժողովրդին ավելի շատ զորքեր մոբիլիզացնել։
Ուժերին կհանձնարարվի պահպանել Գազայի անվտանգությունը, ապառազմականացնել տարածքը և պատրաստել պաղեստինյան ոստիկանական ուժերը ապագայի համար։
ԱՄՆ-ը նպատակ ուներ ուժերի գործողությունները սկսել նոր տարվա սկզբին։ Բանակցություններին ծանոթ աղբյուրներն այս ամսվա սկզբին Middle East Eye-ին հայտնել էին, որ Իսրայելի կողմից Գազայում թուրքական զորքեր ընդունելուց հրաժարվելը հուսահատեցրել է այնպիսի գործընկերների, ինչպիսիք են Ադրբեջանը, Պակիստանը, Սաուդյան Արաբիան և Ինդոնեզիան։
ԱՄՆ կենտրոնական հրամանատարությունը, որին հանձնարարվել էր համակարգել Գազայի հատված մարդասիրական օգնությունը և ուժերի ստեղծումը, այս ամսվա սկզբին գագաթնաժողով էր գումարել Դոհայում։ Այն հրավիրել էր մեծ թվով երկրների, բայց Իսրայելի խնդրանքով բացառել էր Թուրքիային։
Հոկտեմբերի վերջին BBC-ին տված հարցազրույցում Հորդանանի թագավոր Աբդուլլահը հայտարարել էր, որ Հորդանանը զորքեր չի ուղարկի Գազա։
Նոյեմբերին ԱՄԷ-ի բարձրաստիճան պաշտոնյան նույնպես ասել էր, որ երկրի համար դժվար կլինի այս պահին միանալը։
Թուրք պաշտոնյաները, որոնք անանուն խոսեցին թեմայի զգայունության պատճառով, MEE-ին ասել են, որ Թուրքիայի մասնակցության վերաբերյալ վերջնական որոշում դեռևս չի կայացվել։
Նրանք սպասում են Իսրայելի վարչապետ Բենիամին Նեթանյահուի և ԱՄՆ նախագահ Դոնալդ Թրամփի միջև հանդիպմանը այս ամսվա վերջին՝ թեմայի վերաբերյալ պարզաբանումներ տալու համար։
Թուրքիան արդեն իսկ կազմել է ռազմական բրիգադ նման հնարավոր տեղակայման համար։
Անկարայի ներքին աղբյուրները կարծում են, որ Թուրքիայի կառավարությունը կարող է ապրել առանց զորքեր տեղակայելու Գազա, բայց նրանք մտահոգված են, որ ՀԱՄԱՍ-ը չի վստահի մյուս երկրներին, ինչպես դա անում է Թուրքիայի հետ, և ամբողջ կազմակերպությունը կարող է խառնաշփոթի մեջ հայտնվել մոտ ապագայում։ Պաղեստինյան խմբի վրա Թուրքիայի ազդեցությունը նպաստել է սեպտեմբերին հրադադարի համաձայնագրի կնքմանը։
Ավելի վաղ ադրբեջանցի պաշտոնյան հայտարարել էր, որ եթե Ադրբեջանը զորակազմ ուղարկի Գազա, դա կարող է ներքաղաքական հետևանքներ ունենալ։
Թարգմանությունը՝ Էմմա Չոբանյանի
