19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
«Զվարթնոց»-ից 1,5 տարի առաջ հեռացած ռուս սահմանապահները, ըստ ԱԱԾ-ի կայքի, դեռ շարունակում են ծառայությունը
Քաղաքականություն
23.12.2025 | 14:41
Ռուսաստանի ԱԴԾ (ФСБ) ծառայողները, ըստ ԱԱԾ պաշտոնական կայքի, դեռ շարունակում են հայ սահմանապահների հետ համատեղ ծառայություն իրականացնել «Զվարթնոց» օդանավակայանի անցակետերում, իսկ «Ագարակ» ավտոճանապարհային անցման կետում սահմանի պահպանությունն ամբողջությամբ իրականացնում է ՀՀ-ում ՌԴ ԱԴԾ սահմանապահ վարչությունը։
Պաշտոնական կայքում կարդում ենք․
«ՀՀ ԱԱԾ սահմանապահ զորքերը իրականացնում են ՀՀ պետական սահմանի պահպանությունը նաև գործող 8 անցման կետերում՝ 4 ավտոճանապարհային՝ «Բագրատաշեն», «Գոգավան», «Բավրա», «Պրիվոլնոյե», 3 օդային՝ «Զվարթնոց» (ՀՀ-ում ՌԴ ԱԴԾ սահմանապահ վարչության հետ համատեղ), «Էրեբունի», «Գյումրի» և 1 երկաթուղային՝ «Այրում»: «Ագարակ» ավտոճանապարհային անցման կետում սահմանի պահպանությունն իրականացնում է ՀՀ-ում ՌԴ ԱԴԾ սահմանապահ վարչությունը»:
Իրականությունը, սակայն, այլ է։ Դեռևս 2024-ի մարտին Նիկոլ Փաշինյանը տեղեկացրել էր, որ հայկական կողմը դիմել է ռուսական կողմին և տեղեկացրել, որ Հայաստանը բավարար կարողություններ ունի՝ ինքնուրույն իրականացնելու սահմանի հսկողությունը։ Այդպիսով, 2024 թվականի հուլիսի 31-ին ФСБ-ի ծառայողները դադարեցրին իրենց ծառայությունը «Զվարթնոցում»։
Ռուս սահմանապահները «Զվարթնոց»-ում տեղակայվել էին 1992 թվականից։ 2025 թվականի հունվարի 1-ից էլ ռուս սահմանապահները հեռացվեցին հայ-իրանական «Ագարակ» անցակետից։ Նշենք, որ ռուսական կողմը դեռ ներկայացված է հայ-իրանական և հայ-թուրքական սահմաններին։
Թե ինչու Ազգային անվտանգության ծառայությունն արդեն շուրջ մեկուկես տարի չի խմբագրել պաշտոնական կայքի համապատասխան բաժինը, կառույցից հնարավոր չեղավ պարզաբանում ստանալ։ ԱԱԾ մամուլի կենտրոնը մեր զանգերն անպատասխան թողեց։
Նարեկ Կիրակոսյան
