18.12.2025 | 23:24
ՀՀ տարածքում ավտոճանապարհները հիմնականում անցանելի են
Կճոյանը կդառնա՞ կաթողիկոսական տեղապահ․ Փաշինյանի արձագանքը․ ՏԵՍԱՆՅՈՒԹ
Քաղաքականություն
18.12.2025 | 14:12
«Առաջիկա կիրակի օրվա հետ կապված մի քիչ հարցեր կան, միջազգային այց ունեմ»,- լրագրողների հետ զրույցում հայտնեց Նիկոլ Փաշինյանը՝ անդրադառնալով հարցին, թե այս կիրակի որտեղ է պատրաստվում Սուրբ Պատարագի մասնակցել։
Նա տեղեկացրեց, որ պետք է մասնակցի Եվրասիական տնտեսական միության բարձրագույն խորհրդի նիստին, և հնարավոր է չկարողանա պատարագի մասնակցել։ Հարցին, թե արդյոք պատրաստվում է Նավասարդ արքեպիսկոպոս Կճոյանին կաթողիկոսի տեղապահ նշանակել, Փաշինյանը պատասխանեց․
«Պատասխանատու կերպով ասում եմ, որ դա իմ որոշումը չի կարող լինել: Դա եպիսկոպոսաց դասի որոշումը պետք է լինի։ Ձեր հարցի ուղիղ պատասխանն է՝ ոչ, հերքում եմ, ես հերքում եմ ընդհանրապես, որ ունեմ, մտածում եմ տեղապահի որևէ թեկնածուի մասին: Ես հերքում եմ, որ ես նման հարց երբևէ որևէ մեկի հետ քննարկել եմ»,- ասաց վարչապետը։
Հիշեցնենք, որ Գարեգին Բ-ի հրաժարականը պահանջող 10 եպիսկոպոսներ պատրաստվում են այսօր ժամը 17:00-ին գնալ Մայր աթոռ։ Նրանք նաև հավատացյալներին կոչ են արել միանալ իրենց։ Դրանից հետո Արագածոտնի թեմը հայտարարություն է տարածել, որ Բյուրականի Սուրբ Հովհաննես եկեղեցում նախատեսված միասնական ժամերգությունը տեղափոխում են և տեղի է ունենալու Մայր աթոռ Սուրբ Էջմիածնում նույն ժամին, ինչ 10 եպիսկոպոսների հավաքը։
Մայր Աթոռ Սուրբ Էջմիածնում այսօր կայանալիք ակցիայի և ժամերգության ֆոնին ՆԳՆ-ն «հորդորում է զերծ մնալ հակաիրավական, սադրիչ գործողություններից, հարգել այլոց իրավունքները, չտրվել սադրանքների, ենթարկվել հասարակական կարգի պահպանություն իրականացնող ոստիկանության ծառայողների օրինական պահանջներին»:
Ավելի ուշ Մայր Աթոռ Սուրբ Էջմիածինը մտահոգություն է հայտնել եպիսկոպոսների կողմից նախաձեռնված հավաքի մասին։ Մայր Աթոռը հորդորել է պահպանել հանդարտություն, իսկ եպիոսկոպոսների հայտարարությունն անվանել է սադրիչ։
Մանրամասները՝ տեսանյութում։
