18.12.2025 | 16:15
Ինչ է կատարվում Մայր Աթոռում․ ՈՒՂԻՂ
Ես ո՞վ եմ, որ ուղղորդեմ, բայց աջակցում եմ․ Փաշինյանը՝ 10 եպիսկոպոսների մասին. ՏԵՍԱՆՅՈՒԹ
Քաղաքականություն
18.12.2025 | 13:55
Էջմիածնում բախումների որևէ հնարավորություն բացառում եմ։ Այս մասին հայտնել է վարչապետ Նիկոլ Փաշինյանը լրագրողների հետ ճեպազրույցում՝ անդրադառնալով 10 եպիսկոպոսների հայտարարած հավաքին։
Հիշեցնենք՝ Նիկոլ Փաշինյանի հետ հանդիպած եպիսկոպոսները հայտարարել են Մայր Աթոռում հավաքվելու և կաթողիկոսին հեռանալու պահանջ ներկայացնելու մասին։
«Հայաստանի իրավապահ մարմինները ունեն բոլոր գործիքակազմերն ու հնարավորությունները սադրիչ գործելակերպով աչքի ընկնող բոլոր անձանց չեզոքացնելու՝ օրենքով սահմանված կարգով»,- ասաց Փաշինյանը՝ հավելելով․ «10 եպիսկոպոսների գործողությունները ես չեմ ուղղորդում, բայց ողջունում եմ և աջակցում եմ»։
Լրագրողի հարցին, թե արդյոք վարչապետը պատրաստվում է մասնակցել հավաքին, Փաշինյանը պատասխանել է․
«Ես այս պահին նման անհրաժեշտություն և որոշում չեմ տեսնում: Եվ ուզում եմ մի բանի վրա հրավիրել Ձեր ուշադրությունը. 10 եպիսկոպոսները Էջմիածնի միաբաններ են: Այսինքն, Էջմիածնի վանական համալիրը իրենցն է, և իրենք էլ Էջմիածնի վանական համալիրինն են: Եվ հետևաբար՝ նրանց կողմից հնչեցված հրավերը՝ հավաքվելու Մայր Աթոռում, բացարձակապես լեգիտիմ է, որովհետև դա, ըստ էության, իրենց միաբանությունն է, իրենց կեցավայրն է»:
Հավելենք, որ Գարեգին Բ-ի հրաժարականը պահանջող 10 եպիսկոպոսներ պատրաստվում են այսօր ժամը 17:00-ին գնալ Մայր աթոռ։ Նրանք նաև հավատացյալներին կոչ են արել միանալ իրենց։ Դրանից հետո Արագածոտնի թեմը հայտարարություն է տարածել, որ Բյուրականի Սուրբ Հովհաննես եկեղեցում նախատեսված միասնական ժամերգությունը տեղափոխում են և տեղի է ունենալու Մայր աթոռ Սուրբ Էջմիածնում նույն ժամին, ինչ 10 եպիսկոպոսների հավաքը։
Մայր Աթոռ Սուրբ Էջմիածնում այսօր կայանալիք ակցիայի և ժամերգության ֆոնին ՆԳՆ-ը «հորդորում է զերծ մնալ հակաիրավական, սադրիչ գործողություններից, հարգել այլոց իրավունքները, չտրվել սադրանքների, ենթարկվել հասարակական կարգի պահպանություն իրականացնող ոստիկանության ծառայողների օրինական պահանջներին»:
Ավելի ուշ Մայր Աթոռ Սուրբ Էջմիածինը մտահոգություն է հայտնել եպիսկոպոսների կողմից նախաձեռնված հավաքի մասին։ Մայր Աթոռը հորդորել է պահպանել հանդարտություն, իսկ եպիոսկոպոսների հայտարարությունն անվանել է սադրիչ։
Մանրամասները՝ տեսանյութում։
