ՔՊ-ում կռիվ է ընկել․ ինտրիգներ՝ ընտրական ցուցակի ձևավորման շուրջ. ՏԵՍԱՆՅՈՒԹ

«Ասեմ, թե հիմա ինչ է տեղի ունենում «Քաղաքացիական պայմանագիր» կուսակցությունում»,- ՔՊ պատգամավոր Հայկ Սարգսյանը փակագծեր է բացում ՔՊ ընտրական ցուցակի ձևավորման աշխատանքներից։ 380 հոգի ցանկություն է հայտնել իշխող կուսակցության 2026-ի ցուցակով պատգամավոր դառնալ։ Կուսակցության վարչությունը հերթով լսում է բոլորին ու որոշում՝ հաստատել կամ մերժել նրանց թեկնածությունը։ Երեկ, օրինակ, լսել են վարչապետ Նիկոլ Փաշինյանին ու հաստատել մասնակցությունը։ Գործընթացը, սակայն, մյուսների պարագայում այդքան հարթ չի ընթանում։

«Կարճ քննարկում է եղել, որից հետո ինձ տեղեկացրել են, որ իմ առաջադրումը մերժվում է»,- ասաց Հայկ Սարգսյանը։

2018-ի հեղափոխության օրերին Փաշինյանին ուղեկցելով ու նրա ջրի շիշը բռնելով հանրության լայն շրջանակներին հայտնի դարձած Սարգսյանը սրտնեղած է։ Նա միտում է տեսնում իրեն քաղաքական գործընթացներից դուրս թողնելու։ Ասում է՝ թունդ ընդդիմադիր է եղել նախկինների օրոք, իսկ իշխանության այս ութ տարիներին մի շարք օրենքեր հեղինակել, որոնք որոշ կուսակիցների սրտով չեն եղել։ Սարգսյանը հաշտ չէ Փաշինյանի ղեկավարած վարչության որոշման հետ։

«Ամենախնդրահարույց օրենսդրական նախաձեռնությունը, որի պատճառով վարչության անդամներից մեկի գլխավորությամբ մերժվել է իմ թեկնածությունը, օնլայն կազինոների հարկերը կրկնապատկելու մասին է»,- ասաց Սարգսյանը։

Հայկ Սարգսյանը, ըստ էության, ահազանգում է կոռուպցիոն սխեմայի մասին։ Ճեպազրույցում նա հայտարարեց, որ 2026-ին օնլայն խաղատները պետությանը 70 մլն դոլարից ավելի հարկ են վճարելու՝ իր նախաձեռնած օրենսդրական փոփոխություններով։ Ըստ ՔՊ-ականի՝ իր դեմ են դուրս եկել ոլորտի գործարարներն ու նրանց աջակցողները, որոնք ՔՊ-ի վերնախավում են։

Հիշեցնենք՝ ավելի վաղ հայտնի էր դարձել Ալեն Սիմոնյանի ու Հայկ Սարգսյանի կոնֆլիկտի մասին։ Հարցը քննարկվել է նաև կուսակցությունում։ Արդյո՞ք Սարգսյանը Սիմոնյանին է ակնարկում, պատգամավորը խուսափում է ուղիղ պատասխանել՝ միաժամանակ չթաքցնելով Ալեն Սիմոնյանի նկատմամբ բացասական վերաբերմունքը՝ նշելով, որ Սիմոնյանն իր ընկերը չէ։

Ալեն Սիմոնյանը Հայկ Սարգսյանի մեղադրանքներին անթաքույց հեգնանքով է պատասխանում․ «Ինչ ասում է, ճիշտ է ասում»։
Հայկ Սարգսյանը չի պատրաստվում հրաժարվել հաջորդ գումարման խորհրդարանում ևս պատգամավորական մանդատ ունենալու մտքից։

Մտադիր է դիմել ՔՊ կուսակցության կանոնադրության 21-րդ հոդվածի օգնությանը։

«Ես բողոքարկելու եմ վարչության որոշումը։ Ես սա անում եմ իմ գաղափարակից ընկեր Նիկոլ Փաշինյանի համար, մենք իրար հետ երկար ճանապարհ ենք անցել»,- ասաց նա։

ՔՊ վարչությունը չի պարզաբանում, թե ինչու չի հաստատվել Հայկ Սարգսյանի թեկնածությունը, փոխարենը վարչության անդամներից Ալխաս Ղազարյանը թերահավատ է, որ Հայկ Սարգսյանի դիմումն ինչ-որ բան կարող է փոխել։ «Ես կարծում եմ, որ այդ հոդվածը չի վերաբերում վարչության որոշումներին։ Վերջնական որոշումը կրկին վարչությունն է կայացնում»։

Մինչ այդ ՔՊ-ում մեկ այլ, այսպես ասած, մերժված՝ Կարեն Սարուխանյանը, արդեն հասցրել է դիմումն ուղարկել։ Ոչինչ ասել չեմ կարող, քանի որ ընթացիկ գործընթացներ կան»,- ասաց նա։

Մեկ այլ ՔՊ-ական՝ Տիգրան Պարսիլյանը թեկնածուների հաստատման կամ մերժման գործընթացի մասին խոսելիս շատ զգուշավոր է։ Չի ցանկանում շատ մանրամասնել, թե ինչ բնույթի հարցեր են քննարկվում։ Պարսիլյանին բախտը ժպտում է հենց հարցազրույցի ընթացքում։ Էլեկտրոնային նամակ է ստացել Փաշինյանի ղեկավարած վարչությունից ու դա անցյալ տարի մի շարք պաշտոնյաների դեպքում աղմուկ հանած հրաժարականի պահանջից չէ։ «Թեկնածությունը հաստատված է»,- նամակի բովանդակությամբ մեզ հետ կիսվեց պատգամավորը։

ՔՊ ցուցակում ընդգրկվելու ցանկություն չունեցող Լիլիթ Կիրակոսյանի և Քրիստինե Պողոսյանի ուղեկցությամբ քայլող Արուսյակ Ջուլհակյանի թեկնածությունն էլ դեռ չի քննարկվել։

Փաշինյանի բոլոր թեզերն արդարացնող Ջուլհակյանն անհոգ է՝ իր շանսերը բարձր է գնահատում։

Նշենք, որ ՔՊ վարչության կազմած պատգամավորության թեկնածուների ցանկը դեռ պետք է հաստատվի կուսակցության համաժողովի կողմից։ Այդ փուլում նաև կորոշվի, թե ով ցուցակի որ համարն է լինելու։

Մանրամասները՝ տեսանյութում։

Նարեկ Կիրակոսյան