05.04.2026 | 10:35
Մահացել է Զորի Բալայանը
Կճոյանն է խնդրել սահմանափակել իր գործին հասանելիությունը Factor TV-ի հրապարակումից հետո․ Դատական դեպարտամենտ
Քաղաքականություն
17.12.2025 | 17:48
«Դատալեքս»-ում Նավասարդ արքեպիսկոպոս Կճոյանի գործի վերաբերյալ տվյալները փակվել են նրա դիմումի հիման վրա՝ Factor TV-ի հրապարակումից հետո․ «Բավարարել է Սամվել Կճոյանի դիմումը, որով նա խնդրել է սահմանափակել Հակակոռուպցիոն դատարանում առկա իր վերաբերյալ քաղաքացիական գործի հասնաելիությունը datalex.am տեղեկատվական հարթակում»։
Մեր հարցմանն ի պատասխան Դատական դեպարտամենտից հայտնում են՝ դիմումը բավարարվել է Սահմանադրության 34-րդ հոդվածի առաջին մասի, «Անձնական տվյալների պաշտպանության մասին» օրենքի և ԲԴԽ-40-Ռ-105 որոշման հիմքով։
Խորհրդի որոշման մեջ նշվում է․ «Հրապարակման ենթակա դատական ակտում դատավարության մասնակցի՝ Բարձրագույն դատական խորհրդին ուղղված դիմումի հիման վրա կարող են ապանձնավորվել նաև օրենսդրությամբ սահմանված՝ ֆիզիկական անձանց վերաբերյալ անձնական տվյալ հանդիսացող այլ տեղեկություններ»:
Այսօրվա դատական նիստի ընթացքում էլ Կճոյանի ներկայացուցիչը միջնորդել է գործի քննությունը դռնփակ անցկացնել, սակայն նախագահող դատավոր Կարապետ Բադալյանը մերժել է այն։
Հիշեցնենք՝ դեկտեմբերի 8-ին Factor TV-ն հրապարակում արեց Արարատյան Հայրապետական թեմի առաջնորդական փոխանորդ Նավասարդ արքեպիսկոպոս Կճոյանի վերաբերյալ վարույթի մասին․ Գլխավոր դատախազությունը պահանջում է Կճոյանի՝ իր տան հարևանությամբ գտնվող հողամասի համար 2012-ին 49 տարով տրված կառուցապատման իրավունքը դադարած համարել։
Մեր անդրադարձից հետո «Դատալեքս» դատական տեղեկատվական համակարգում գործի վերաբերյալ ինֆորմացիան սահմանափակվել է՝ այն դեպքում, երբ նյութի պատրաստման ընթացքում այն հասանելի էր։ Հատկանշանակ է, որ այս գործը դատարան էր հանձնվել Կճոյանի և ևս 7 եպիսկոպոսների հետ վարչապետ Նիկոլ Փաշինյանի հանդիպումից շաբաթներ առաջ, երբ պարզ դարձավ, որ Կճոյանն աջակցում է վարչապետի՝ կաթողիկոսի դեմ արշավին։
Եվգենյա Համբարձումյան
