ՖԻՖԱ․ Տարվա լավագույն ֆուտբոլիստը, մարզիչը և գոլը․ ՏԵՍԱՆՅՈՒԹ

Կատարի մայրաքաղաք Դոհայում կայացավ Ֆուտբոլի միջազգային ֆեդերացիայի (ՖԻՖԱ) կողմից անցկացվող FIFA The Best ամենամյա մրցանակաբաշխությունը։

ՖԻՖԱ-ի վարկածով 2025թ․ լավագույն ֆուտբոլիստ ճանաչվեց Փարիզի ՊՍԺ-ի և Ֆրանսիայի հավաքականի հարձակվող Ուսման Դեմբելեն։

ՊՍԺ-ի կազմում անցած մրցաշրջանում Ֆրանսիայի չեմպիոն, գավաթակիր, սուպերգավաթակիր ու Չեմպիոնների լիգայի հաղթող դարձած 28-ամյա ֆուտբոլիստը քվեարկության արդյունքում առաջ է անցել Լամին Յամալից («Բարսելոնա», Իսպանիա), Աշրաֆ Հակիմիից (ՊՍԺ, Մարոկկո), Հարի Քեյնից («Բավարիա», Անգլիա), Կիլիան Մբապեից («Ռեալ Մադրիդ», Ֆրանսիա), Նունու Մենդեշից (ՊՍԺ, Պորտուգալիա), Քոուլ Փալմերից («Չելսի», Անգլիա), Պեդրիից («Բարսելոնա», Իսպանիա), Ռաֆինյայից («Բարսելոնա», Բրազիլիա), Մոհամեդ Սալահից («Լիվերպուլ», Եգիպտոս) և Վիտինյայից (ՊՍԺ, Պորտուգալիա)։

Տարվա լավագույն մարզիչի մրցանակին արժանացավ ՊՍԺ-ն գլխավորող Լուիս Էնրիկեն:

Մրցանակին հավակնում էին նաև Խավիեր Ագիրեն (Մեքսիկայի հավաքական), Միկել Արտետան («Արսենալ»), Հանս-Դիտեր Ֆլիկը («Բարսելոնա»), Էնցո Մարեսկան («Չելսի»), Ռոբերտո Մարտինեսը (Պորտուգալիայի հավաքական) և Առնե Սլոթը («Լիվերպուլ»)։

Լավագույն դարպասապահն անգլիական «Մանչեսթեր Սիթին» ու Իտալիայի հավաքականը ներկայացնող Ջանլուիջի Դոնարուման է, որը նախորդ մրցաշրջանն անցկացրել էր ՊՍԺ-ի կազմում։

Ուսման Դեմբելեն, Լուիս Էնրիկեն ու Ջանլուիջի Դոնարուման այս տարի նույն անվանակարգերում լավագույնն էին ճանաչվել նաև «Ոսկե գնդակի» մրցանակաբաշխության ժամանակ։

Տարվա լավագույն գոլի մրցանակը ստացավ արգենտինական «Ինդեպենդիենտեի» արգենտինացի կիսապաշտպան Սանտիագո Մոնտիելը (տեսանյութ)։ Ֆերենց Պուշկաշի անվան մրցանակին հավակնում էր 11 ֆուտբոլիստ։ Ցուցակում ընդգրկվել էին 2024թ․ օգոստոսի 11-ից մինչև 2025թ․ օգոստոսի 2-ը գրանցված գոլերը։

FIFA The Best մրցանակաբաշխության հաղթողները հայտնի են դառնում ազգային հավաքականների գլխավոր մարզիչների ու ավագների և լրագրողների քվեարկության արդյունքում։