Սև ծովում հարձակումները սպառնում են նավարկության անվտանգությանը. Էրդողան

Թուրքիայի նախագահ Ռեջեփ Թայիփ Էրդողանը զգուշացրել է, որ ռուս-ուկրաինական պատերազմի ընթացքում գրանցվող հարձակումները վտանգում են Սև ծովում նավարկության անվտանգությունը՝ ասելով, որ Անկարան իր մտահոգությունները փոխանցում է բոլոր կողմերին, գրում է Turkiye tօday-ը։

«Վերջին օրերին իրականացված փոխադարձ հարձակումները լրջորեն սպառնում են Սև ծովում նավարկության անվտանգությանը։ Քաղաքացիական նավերի թիրախավորումը ոչ մեկին օգուտ չի տալիս։ Մենք մեր նախազգուշացումները փոխանցում ենք կողմերին», – ասել է  Էրդողանը դեսպանների համաժողովում ելույթ ունենալիս։

Ռուսաստանի և Ուկրաինայի միջև մարտական ​​գործողությունները գնալով ավելի են տարածվում Սև ծովում։ Ուկրաինան շաբաթ օրը հայտարարեց, որ Ռուսաստանը հարվածել է Սև ծովում արևածաղկի ձեթ տեղափոխող թուրքական նավին՝ մեկ օր անց այն բանից հետո, երբ ռուսական հարձակումը հրդեհ էր առաջացրել ուկրաինական նավահանգստում թուրքական սեփականության նավի վրա։

Այս միջադեպը թուրքական նավի վրա երկրորդ հարվածն էր երկու օրվա ընթացքում և տեղի ունեցավ այն բանից կարճ ժամանակ անց, երբ Էրդողանը կոչ էր  արել դադարեցնել նավահանգիստների և էներգետիկ օբյեկտների վրա հարձակումները ուրբաթ օրը Ռուսաստանի նախագահ Վլադիմիր Պուտինի հետ անձնական բանակցությունների ժամանակ։

«Ռուսաստանը թիրախային հարված է հասցրել թուրքական «VIVA» նավի դեմ, որը դեպի Եգիպտոս էր  շարժվում արևածաղկի ձեթով բարձված»,- հայտարարել էր Ուկրաինայի ռազմածովային ուժերը։