Քաղաքականություն
15.12.2025 | 19:13
Լուվրի աշխատակիցները գործադուլ են սկսել․ նրանք դժգոհ են աշխատանքային պայմաններից, գրում է France 24-ը։
CFDT արհմիությունը հայտարարել է, որ գործադուլ սկսելու հարցով քվեարկությունը տեղի է ունեցել երկուշաբթի առավոտյան 400 աշխատողների հանդիպման ժամանակ, և մեծամասնությունը կողմ է արտահայտվել։
Աշխարհի ամենաշատ այցելվող թանգարանը չի բացվել նախատեսված ժամանակացույցի համաձայն։ Լուվրի կայքում տեղադրված հաղորդագրությունը այցելուներին տեղեկացնում էր, որ «թանգարանը ժամանակավորապես փակ է»։
Գործադուլի քվեարկությունը տեղի է ունեցել անցյալ շաբաթ արհմիությունների և կառավարության պաշտոնյաների, այդ թվում՝ մշակույթի նախարար Ռաչիդա Դատիի միջև կայացած բանակցություններից հետո: Արհմիությունների առաջնորդները նշել են , որ բանակցությունները չեն մեղմել Լուվրի ֆինանսավորման վերաբերյալ իրենց բոլոր մտահոգությունները։
Անցյալ շաբաթ քննարկումների երեք փուլերը «բավականին զգալի առաջընթաց» են արձանագրել լրացուցիչ անձնակազմ վարձելու և պետական ֆինանսավորումը մեծացնելու խոստումների վերաբերյալ, Associated Press-ին ասել է CFDT արհմիության մշակութային թևի գլխավոր քարտուղար Ալեքսիս Ֆրիչեն։ Այնուամենայնիվ, նա ասել է, որ առաջարկները պետք է հաստատվեն գրավոր և դեռևս չեն համապատասխանում բոլոր պահանջներին։
«Դա լիովին բավարար չէ, աշխատակիցները բավականին վճռական են», – հավելել է նա։
Անցյալ շաբաթ Դատիին ուղղված գործադուլի մասին իրենց ծանուցման մեջ CFDT, CGT և Sud արհմիությունները նշել էին, որ Լուվրը գտնվում է «ճգնաժամի» մեջ՝ անբավարար ռեսուրսներով և «ավելի ու ավելի վատթարացող աշխատանքային պայմաններով»։
Թարգմանությունը՝ Էմմա Չոբանյանի
