31.10.2026 | 19:51
Քննարկվել են ՀՀ և բրազիլական ինքնաթիռաշինական համաշխարային ընկերության միջև համագործակցության հնարավոր հեռանկարները
Նոր մեղադրանք՝ Լյովա Սարգսյանին․ ինչ գործով է անցնում երրորդ նախագահի կրտսեր եղբայրը․ ՏԵՍԱՆՅՈւԹ
Քաղաքականություն
12.12.2025 | 19:45
Լյովա Սարգսյան․ Սերժ Սարգսյանի կրտսեր եղբայրը․ հետախուզման մեջ է արդեն 6 տարի։ Factor TV-ին հայտնի դարձավ, որ երրորդ նախագահի եղբորը նոր մեղադրանք է առաջադրվել։
Սարգսյանը դեսպան է եղել Սիրիայում 1998-2004 թվականներին, համատեղության կարգով դեսպան է աշխատել նաև Հորդանանում՝ 2000-2005 թվականներին։ Նոր մեղադրանքում ասվում է, որ դեսպանի պաշտոնը զբաղեցրած ժամանակ, սիրիահայ գործարար Ավեդիս Կարագուլյանից առանձնապես խոշոր չափերով կաշառք է ստացել։
«․․․Լյովա Սարգսյանին տվել է առանձնապես խոշոր չափերով կաշառք՝ գույքի նկատմամբ սեփականության իրավունք, ապա խոչընդոտներ վերացնելու եղանակով Կարագուլյանն օժանդակել է Լյովա Սարգսյանի կողմից հանցավոր ճանապարհով ձեռք բերված այդ գույքի ծագման աղբյուրը և իրական պատկանելիությունը թաքցնելուն և խեղաթյուրելուն»,- նշվում է մեղադրական եզրակացության մեջ։
Մեղադրանք է առաջադրված թե՛ Սիրիահայ գործարարին, թե՛ Լյովա Սարգսյանին։ Գործը դատարանում է։ Սերժ Սարգսյանի եղբոր նկատմամբ խափանման միջոց է ընտրվել բացակայելու արգելքը, համակցված այլընտրանքային խափանման միջոց է կիրառվել նաև գրավը։ Բայց իրավապահներին նրա գտնվելու վայրը հայտնի չէ, հետախուզում են։
Ավեդիս Կարագուլյանի անունն առաջին անգամը չէ, որ շրջանառվում է տարբեր քրեական գործերում։ «Ավո ՖՄՀ» կառուցապատող ընկերության սեփականատերը մի շարք քրեական ու քաղաքացիական գործերով է անցնում։ Նա որպես մեղադրյալ է ներգրավվել նաև Հյուսիսային պողոտայի 14 սեփականատերերի գործով։ Տուժողները պնդում են՝ գործարարը խաբեությամբ և խարդախությամբ համաձայնության է եկել գնահատող կազմակերպության հետ, և քաղաքացիների գույքերը շուկայականից մի քանի անգամ էժան են գնահատել։
Կարագուլյանը նաև Նալբանդյան-Աբովյան-Արամի փողոցների միջնամասի կառուցապատողն է եղել։ Նրա մասով գործն արդեն Հակակոռուպցիոն դատարանում է, մակագրվել է դատավոր Սարգիս Պետրոսյանին։
Իսկ Լյովա Սարգսյանը մեղադրյալի կարգավիճակ ունի նաև «Հյուսիս-Հարավ»-ի ավտոմայրուղու կառուցման ընթացքում կատարված չարաշահումների գործով, նրա նկատմամբ խափանման միջոց էր ընտրվել կալանավորումը, բայց նա արդեն անհետացել էր իրավապահների տեսադաշտից։
Մանրամասները՝ տեսանյութում։
Եվգենյա Համբարձումյան
