Ուղիղ հարցրել եմ Հայկազ Բաղմանյանին` ինչո՞ւ եք սպանել իմ երեխուն․ Տիգրան Օհանջանյանի մայր․ ՏԵՍԱՆՅՈՒԹ

«Տիկին Վարդապետյանը միշտ ասում է՝ եթե ես ձեզ ընդունեմ, շահերի բախում կլինի»,- ասաց 2007 թվականի օգոստոսի 30-ին Կարճաղբյուրի զորամասերից մեկում խաղաղ պայմաններում մահացած Տիգրան Օհանջանյանի մայրը՝ Գոհար Սարգսյանը։

«Ի՞նչ շահերի բախման մասին է խոսքը։ Այսինքն՝ իրենք երևի գիտեն ով է մարդասպանը, հա՞։ Ես էլ գիտեմ՝ ով է։ Բոլորն էլ ճանաչում են, իրենք էլ են ճանաչում՝ Հայկազ Բաղմանյանը՝ իր շքախմբով։ Բազմիցս ասել եմ՝ եթե իմ բառերի մեջ կա զրպարտություն, թող ինձ մեղադրանք առաջադրեն։ Դեպքից անցել է 12 տարի, նոր Հայկազ Բաղմանյանին կանչել են հարցաքննության և էն հարցերը չեն տվել։ Ինքը եղել է Կարճաղբյուրի զորամասի կորպուսի հրամանատարը։ Դեպքը տեղի է ունեցել իր նստավայրից 15 մետր հեռավորության վրա, իր «ախռանայի» սենյակից էլ՝ մեկուկես մետր հեռավորության վրա։ Իմ երեխու դին գտել են իր «ախռանայի» պատուհանի տակից։ Ես ու՞մ կասկածեմ»,- հարցնում է սևազգեստ մայրը։

Գոհար Սարգսյանի խոսքով՝ ինքն ուղիղ հարցրել է Հայկազ Բաղմանյանին՝ ինչո՞ւ է սպանել իր տղային։

«Ասաց՝ ես ինչո՞ւ պիտի սպանեի զինվորին, ես ի՞նչ գործ ունեմ զինվորի հետ»,- պատմում է Սարգսյանը։

Հիշեցնենք, որ պաշտոնական վարկածի համաձայն՝ Տիգրան Օհանջանյանը զորամասի կապի հանգույցի մոտ հպվելով ռադիոռելային կայանը պահող ձգալարին՝ էլեկտրահարվել է և տեղում մահացել: Զինծառայողի ծնողները պնդում են՝ դատաբժիշկները չեն արձանագրել իրենց որդու մարմնի վրա եղած վնասվածքները, որոնք, ըստ նրանց, վկայում են ծեծի մասին։

Մանրամասները՝ տեսանյութում։

Արփի Հակոբյան