14.04.2026 | 23:28
Կրեմլը վերանայում է ինտերնետի սահմանափակումների նկատմամբ մոտեցումը՝ վախենալով Պուտինի վարկանիշի անկումից․ Bloomberg
Հայաստանում մարդու իրավունքները պաշտպանված չեն․ պատասխանատուները Փաշինյանը և Վարդապետյանն են․Պապիկյան․ ՏԵՍԱՆՅՈՒԹ
Հասարակություն
10.12.2025 | 11:55
«Ամբողջ աշխարհն այսօր նշում է Մարդու իրավունքների պաշտպանության օրը։ Շատ խորհրդանշական օր է, և մենք ցանկանում ենք այս ասուլիսի միջոցով հանրությանը ներկայացնել, որ Հայաստանի Հանրապետությունում մարդու իրավունքները պաշտպանված չեն. ոչ միայն մարդու իրավունքների պաշտպանության օրը, այլև տարվա մյուս 365 օրերի ընթացքում ևս»,- ասաց փաստաբան Արայիկ Պապիկյանը։
«Անցնող 2025 թվականի ընթացքում քննության փուլում գտնվող հինգ գործերով՝ Անդրանիկ Մկրտչյանի, Արթուր Ղազարյանի, Վալերի Մուրադյանի, Տիգրան Օհանջանյանի, Լևոն Թորոսյանի գործերով որևէ տեղաշարժ չի եղել։ Ցանկանում եմ նշել, որ այս հինգ գործերի բացահայտման պատասխանատուն Հայաստանի Հանրապետության գլխավոր դատախազ Աննա Վարդապետյանն է, ով գործերի բացահայտման բանալին ունի դեռևս 2021-22 թվականներից, և ինքը դրանց մասին նաև անձամբ մի քանի անգամ զեկուցել է վարչապետ Նիկոլ Փաշինյանին։ Այնպես որ, դեռևս այս սպանությունների չբացահայտման պատասխանատուները մնում են անպատիժ, իսկ նրանց հովանավորները, ըստ էության, փաստորեն երկրի վարչապետն ու գլխավոր դատախազն են»,- նշեց Պապիկյանը։
Փաստաբանի խոսքով՝ խաղաղ պայմաններում զորամասերում կամ հերթապահության ժամանակ սպանված զինծառայողների գործերով պետությունը շարունակում է ցուցաբերել անգործություն։
«Հայտնի է նաև, որ Վալերի Մուրադյանի և Տիգրան Օհանջանյանի գործով ունենք Եվրոպական դատարանի վճիռներ։ Արթուր Ղազարյանի և Անդրանիկ Մկրտչյանի գործով Եվրոպական դատարանում արդեն գանգատներ կան, շուտով կլինի նաև Լևոն Թորոսյանինը։ Այս առումով ևս պետությունը ոչինչ չի կատարում»,-նշեց Պապիկյանը՝ ընդգծելով, որ այս ամենի պատասխանատուն Փաշինյանն ու գլխավոր դատախազ Աննա Վարդապետյանն են։
Մանրամասները՝ տեսանյութում։
Արփի Հակոբյան
