ԵՄ դիվանագիտության նախկին ղեկավար Ֆեդերիկա Մոգերինին ձերբակալությունից հետո ազատ է արձակվել

ԵՄ արտաքին գործերի նախկին ղեկավար, Եվրոպայի քոլեջի ռեկտոր Ֆեդերիկա Մոգերինին ազատ է արձակվել ձերբակալությունից հետո, հաղորդում է AGI լրատվական գործակալությունը:

Նշվում է, որ ԵՄ արտաքին քաղաքականության հարցերով նախկին բարձր ներկայացուցիչ Ֆեդերիկա Մոգերինին երեկ ձերբակալվել էր խարդախության հետաքննության շրջանակում և ազատ է արձակվել կեսգիշերն անց՝ ժամը 1:00-ի սահմաններում: Ստեֆանո Սաննինոն և քոլեջի աշխատակազմի անդամներից մեկը նույնպես ազատ են արձակվել, որոնք, ինչպես Մոգերինին, հարցաքննվել են։ Եվրոպական դատախազությունը հաստատել է այս տեղեկությունը։

«Բելգիայի դաշնային քրեական ոստիկանության (FGP West-Vlaanderen) կողմից հարցաքննվելուց հետո երեք անձանց պաշտոնապես տեղեկացվել է նրանց առաջադրված մեղադրանքների մասին, որոնք ներառում են գնումների ոլորտում խարդախություն և կոռուպցիա, շահերի բախում և մասնագիտական ​​գաղտնիքի խախտում: Նրանք ազատ են արձակվել, քանի որ չկա  փախուստի վտանգ»,- հաղորդում է EPPO-ն:

Ֆեդերիկա Մոգերինին 2014-2019 թվականներին զբաղեցրել է Եվրամիության արտաքին գործերի և անվտանգության քաղաքականության հարցերով բարձր ներկայացուցչի պաշտոնը Ժան-Կլոդ Յունկերի հանձնաժողովում: Մինչ այդ նա Իտալիայի արտաքին գործերի նախարարն էր Մատեո Ռենցիի կառավարությունում (2014 թվականի փետրվարից մինչև հոկտեմբեր) և Իտալիայի խորհրդարանի ստորին պալատի անդամ (2008–2014):

Ավելի վաղ հաղորդվել էր, որ խուզարկություններ են իրականացվել Բրյուսելում գտնվող Եվրոպական արտաքին գործողությունների ծառայության (EEAS) գլխավոր գրասենյակում և Բրյուգեում գտնվող Եվրոպայի քոլեջում՝ խարդախության հետաքննության շրջանակում: Նշվել էր, որ ձերբակալել է երեք կասկածյալ՝ այդ թվում՝ Մոգերինին:

Թարգմանությունը՝ Էմմա Չոբանյանի