Ձերբակալվել է ԵՄ դիվանագիտության նախկին ղեկավարը․ ԵՄ արտաքին գործողությունների ծառայության գրասենյակում խուզարկություն է անցկացվել

Դեկտեմբերի 2-ին խուզարկություններ են իրականացվել Բրյուսելում գտնվող Եվրոպական արտաքին գործողությունների ծառայության (EEAS) գլխավոր գրասենյակում և Բրյուգեում գտնվող Եվրոպայի քոլեջում՝ խարդախության հետաքննության շրջանակում: Եվրոպական դատախազության (EPPO) տվյալներով՝ հետաքննությունը վերաբերում է երիտասարդ դիվանագետների համար ԵՄ-ի կողմից ֆինանսավորվող ուսումնական ծրագրի հետ կապված խախտումներին, գրում է The Insider-ը։

Հաղորդվում է, որ երեք կասկածյալներ են ձերբակալվել։ Նրանց տները նույնպես խուզարկվել են։ EPPO-ն նախկինում խնդրել էր չեղարկել մի քանի կասկածյալների անձեռնմխելիությունը, ինչը բավարարվել էր համապատասխան մարմնի կողմից։

Գործը վերաբերում է Եվրամիության Դիվանագիտական ​​ակադեմիայի նախագծին, որը ԵՄ անդամ պետությունների երիտասարդ դիվանագետների համար նախատեսված 9-ամսյա ուսումնական ծրագիր է: 2021/2022 թվականներին Եվրոպական արտաքին գործերի ծառայությունը (EEAS) այս ծրագրի անցկացման իրավունքը մրցույթի արդյունքում շնորհել է Եվրոպայի քոլեջին: Հետաքննության համաձայն՝ մրցույթի կանոնները խախտվել են. կան հիմքեր ենթադրելու, որ Բելգիայի Եվրոպայի քոլեջի ներկայացուցիչները տեղեկացվել են ընտրության չափանիշների մասին պաշտոնական հրապարակումից առաջ:

Հայտնաբերված խախտումները կարող են ներառել գնումների հետ կապված խարդախություն, կոռուպցիա, շահերի բախում և մասնագիտական ​​գաղտնիքի խախտումներ, ասվում է EPPO-ի հայտարարության մեջ։

Ըստ լրատվամիջոցների հաղորդումների՝ ձերբակալվածների թվում է Եվրոպական դիվանագիտության նախկին ղեկավար Ֆեդերիկա Մոգերինին։

Եվրոպական հանձնաժողովի նախկին փոխնախագահ և Եվրոպայի քոլեջի ռեկտոր Ֆեդերիկա Մոգերինին ձերբակալվել է ԵՄ միջոցների հետ կապված հնարավոր խարդախության հետաքննության շրջանակում, հաղորդում է Le Soir-ը։ Նշվում է, որ հարցաքննության համար ձերբակալվածների թվում է նաև Եվրոպայի քոլեջի ղեկավար և Եվրոպական արտաքին գործողությունների ծառայության նախկին գլխավոր քարտուղար (2021–2025), իտալացի դիվանագետ Ստեֆանո Սաննինոն։

Թարգմանությունը՝ Էմմա Չոբանյանի