07.09.2026 | 13:33
Պուտինը զանգահարել է Ալիևին․ քննարկվել են առևտրատնտեսական ու հումանիտար հարցեր
Թրամփը Մադուրոյին մեկ շաբաթ է տվել՝ Վենեսուելան լքելու համար․ ժամկետի ավարտից հետո նա փակել է երկրի երկինքը. Reuters
Քաղաքականություն
02.12.2025 | 11:41
Վենեսուելայի նախագահ Նիկոլաս Մադուրոյի հետ հեռախոսազրույցի ժամանակ ԱՄՆ նախագահ Դոնալդ Թրամփը նրան մեկ շաբաթ ժամանակ է տվել՝ երկիրը լքելու համար, սակայն նա մերժել է։ Այս մասին հաղորդում է Reuters-ը՝ վկայակոչելով չորս աղբյուրների, փոխանցում է Meduza-ն։
Նոյեմբերի 21-ին կայացած հեռախոսազրույցի ժամանակ Թրամփը Մադուրոյին ասել է, որ կարող է ընտանիքի հետ մեկնել իր ընտրած ցանկացած վայր։ ԱՄՆ նախագահի տված ժամկետը լրացել է ուրբաթ՝ նոյեմբերի 28-ին, որից հետո Թրամփը սոցիալական ցանցերում գրառում է կատարել՝ հայտարարելով Վենեսուելայի վրա երկնքի փակման մասին։
Մադուրոն, ըստ Reuters-ի աղբյուրների՝ Թրամփին ասել է, որ պատրաստ է լքել Վենեսուելան, բայց պայմանով, որ ինքն ու իր ընտանիքի անդամները ստանան լիարժեք իրավական ներում, ներառյալ՝ ԱՄՆ բոլոր պատժամիջոցների վերացում և Միջազգային քրեական դատարանում իր դեմ գործի կարճում։
Reuters-ի տվյալներով՝ զրույցը տևել է 15 րոպեից պակաս, որի ընթացքում Թրամփը «մերժել է Վենեսուելայի նախագահի մի շարք խնդրանքներ»։ Մասնավորապես, Մադուրոն խնդրել է վերացնել 100-ից ավելի վենեսուելացի պաշտոնյաների նկատմամբ սահմանված պատժամիջոցները, որոնցից շատերին ԱՄՆ-ը մեղադրում է մարդու իրավունքների խախտումների, թմրանյութերի ապօրինի շրջանառության կամ կոռուպցիայի մեջ։ Երկու աղբյուրների համաձայն՝ Վենեսուելայի նախագահը նաև խնդրել է, որ փոխնախագահ Դելսի Ռոդրիգեսը գլխավորի անցումային կառավարությունը։
Հիշեցնենք՝ Թրամփը հաստատել է, որ խոսել է Մադուրոյի հետ, բայց մանրամասներ չէր հայտնել:
Երեք աղբյուրների համաձայն՝ Մադուրոյի վարչակազմը ևս մեկ հեռախոսազրույց է խնդրել ԱՄՆ նախագահի հետ:
The New York Times-ն առաջիններից էր, որ գրել էր Թրամփի և Մադուրոյի միջև զրույցի մասին։ Նրա տվյալներով՝ Մադուրոն զրույցի ընթացքում ասել է, որ պատրաստ է երկու-երեք տարվա ընթացքում հրաժարական տալ, սակայն Վաշինգտոնը մերժել է այդ ծրագիրը։ The Wall Street Journal-ն էլ ավելի ուշ հավելել է, որ Թրամփը սպառնացել է Մադուրոյին քննարկել այլ տարբերակներ, այդ թվում՝ ուժի կիրառում, եթե նա կամավոր չհեռանա պաշտոնից։
Թարգմանությունը՝ Էմմա Չոբանյանի
