«Սրբազան պայքար» շարժման գործով մեղադրյալ, պատգամավոր Արթուր Սարգսյանի խափանման միջոց կալանավորումը փոխվել է 

«Սրբազան պայքար» շարժման գործով մեղադրյալ, Ազգային ժողովի «Հայաստան» խմբակցության պատգամավոր Արթուր Սարգսյանի խափանման միջոց կալանավորումը փոխվել է տնային կալանքով՝ համակցված գրավով։ Այս մասին հայտնում է նրա պաշտպան Արամ Վարդևանյանը։

Որոշումը կայացրել է Վերաքննիչ քրեական դատարանի դատավոր Մխիթար Պապոյանը։

Նշենք, որ «Սրբազան պայքար» շարժման գործով նախնական դատալսումների ընթացքում դատավոր Կարեն Ֆարխոյանn Արթուր Սարգսյանի նկատմամբ խափանման միջոց է ընտրել կալանքը։ 2025 թվականի նոյեմբերի 10-ին պաշտպանական կողմը բողոքարկել է Ֆարխոյանի որոշումը, որը, փաստորեն, Մխիթար Պապոյանը վարույթ է ընդունել և որոշել վերացնել պատգամավորի կալանքը։ 

Հիշեցնենք, որ Արթուր Սարգսյանը, Բագրատ արքեպիսկոպոս Գալստանյանն ու ևս 16 անձ մեղադրվում են ահաբեկչություն կատարելու և իշխանության յուրացում նախապատրաստելու մեջ։

Ըստ մեղադրանքի՝ Բագրատ արքեպիսկոպոս Գալստանյանին (աշխարհիկ անունը՝ Վազգեն Գալստանյան) մեղադրանք է առաջադրվել այն բանի համար, որ «նա, իր կողմից նախաձեռնված և ղեկավարվող «Սրբազան պայքար» անվանումով շարժումն իրականացնելու մի քանի ամիսների ընթացքում, չկարողանալով Հայաստանի Հանրապետության Սահմանադրությամբ թույլատրված եղանակներով իրագործել իր կողմից շարժման առջև դրված՝ Հայաստանի Հանրապետությունում իշխանությունը ստանձնելու նպատակը, 2024 թվականի նոյեմբերից սկսած նպատակադրվել է այն իրագործել ՀՀ Սահմանադրությամբ չթույլատրված եղանակով, և այդ նպատակի իրականացման համար շարժման մի շարք մասնակիցների՝ Մովսես Շարբաթյանի, Հայկ Շահնազարյանի, Տիգրան Թոփալյանի, Լիդիա Մանթաշյանի, Հրայր Հակոբյանի, Կարո Օկումուշյանի, Արթուր Սարգսյանի, Իգոր Սարգսյանի, Արա Ռոստոմյանի, Արսեն Ղազարյանի, Արման Իսրայելյանի, Աղվան Արշակյանի, Արմեն Ալեքսանյանի, Միհրան Մախսուդյանի, Դավիթ Գալստյանի և այլ անձանց հետ նախնական համաձայնությամբ, խմբի կազմում ձեռք են բերել ահաբեկչություն կատարելու և իշխանությունը զավթելու համար անհրաժեշտ միջոցներ և գործիքներ, ինչպես նաև դիտավորությամբ ստեղծել են այլ պայմաններ՝ այդ կերպ կատարելով իշխանությունը յուրացնելու նախապատրաստություն»: 

Այս գործով մեղադրյալի աթոռին է ևս 17 անձ՝ ԱԺ «Հայաստան» խմբակցության պատգամավոր Արթուր Սարգսյանը, Մովսես Շարբաթյանը, Աղվան Արշակյանը, Արա Ռոստոմյանը, Արման Իսրայելյանը, Արմեն Ալեքսանյանը, Արսեն Ղազարյանը, Դավիթ Գալստյանը, Իգոր Սարգսյանը, Լիդյա Մանթաշյանը, Կարո Օկումուշյանը, Հրայր Հակոբյանը, Միհրան Մախսուդյանը, Տիգրան Գալստյանը, Տիգրան Թոփալյանը, Վահագն Չախալյանը, Հայկ Շահնազարյանը։ Բոլորը մեղադրվում են նույն հոդվածներով, ինչ Բագրատ արքեպիսկոպոս Գալստանյանը, այսինքն՝ ահաբեկչություն, ինչպես նաև իշխանությունը զավթելը նախապատրաստելը։ 

Հիշեցնենք, որ հունիսի 25-ին իրավապահները միաժամանակ խուզարկություններ էին սկսել «Սրբազան շարժում» անունը ստացած նախաձեռնության անդամների բնակարաններում, որից հետո շարժման անդամները ձերբակալվել են ու Քննչական կոմիտեում քննվող քրեական վարույթով ներգրավվել որպես մեղադրյալ։

Գործն արդեն երեք ամսից ավելի է՝ դատարանում է։

Արաքս Մամուլյան