01.10.2026 | 11:25
Ուկրաինան անցնում է «առավելագույն խնայողության ռեժիմի». ռազմական բյուջեին չի բավարարում 27 միլիարդ դոլար
Եթե Դուք այսքան տարի ազդել եք իմ նյարդերի վրա, ես ինչո՞ւ չպիտի ազդեմ. Յուրի Խաչատուրովը՝ դատավորին․ ՏԵՍԱՆՅՈՒԹ
Հասարակություն
01.12.2025 | 13:38
Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործով դատական նիստն այսօր կարճ տևեց․ Յուրի Խաչատուրովն իրեն հասկանալի լեզվով չէր ստացել մեղադրանքի տեսքը։
Նշենք, որ նախորդ դատական նիստին հանրային մեղադրող Հայկ Հովհաննիսյանը դատարանին էր հանձնել նոր մեղադրանքի տեքստը, որը, եթե դատարանը թույլատրի, ցանկանում է ներկայացնել Ռոբերտ Քոչարյանին ու մյուսներին։ Յուրի Խաչատուրովը, սակայն, պահանջել էր իրեն տրամադրել տեքստի ռուսերեն տարբերակը։ Դատարանը նիստից անմիջապես հետո թարգմանության էր հանձնել տեքստը, սակայն այսօրվա նիստին այն դեռևս չէր ստացվել։
Դատավոր Սարգիս Պետրոսյանը Խաչատուրովից փորձեց հստակեցնել՝ եթե տեքստի ռուսերեն տարբերակը ստանալուց հետո այն կարդալու է, ուրեմն նիստը հետաձգի, իսկ եթե ստանալու դեպքում ևս պաշտպանի՝ Միհրան Պողոսյանի միջոցով է ծանոթանալու դրան և անձամբ չի կարդալու, ապա նիստը կարող են շարունակել, քանի որ պաշտպանը հայերենով արդեն իսկ ստացել է մեղադրանքի տեքստը։
«Եթե դուք այսքան տարի ազդել եք իմ նյարդերի վրա, ես ինչո՞ւ չպետք է ազդեմ»,- ասաց Խաչատուրովը՝ նշելով, որ ցանկանում է ստանալ թարգմանությունը, նոր մասնակցել նիստին։
Դատավորը հետաձգեց գործի քննությունը։
Մանրամասները՝ տեսանյութում։
Արաքս Մամուլյան
