29.07.2026 | 15:30
Տոկիոյի Օլիմպիական խաղերի մասնակիցն անհետ կորել է Բրազիլիայում
Արցախում հայկական ժառանգությունը ոչնչացնող Ադրբեջանը ՅՈՒՆԵՍԿՕ-ի Համաշխարհային ժառանգության կոմիտեի անդամ է ընտրվել
Քաղաքականություն
25.11.2025 | 15:21
Ադրբեջանը ՅՈՒՆԵՍԿՕ-ի Համաշխարհային ժառանգության կոմիտեի անդամ է ընտրվել չորս տարի ժամկետով՝ 2025-2029 թվականների համար։ Այս մասին հայտնել է Ադրբեջանի արտաքին գործերի նախարարությունը։
Ադրբեջանական գերատեսչության տվյալներով՝ որոշումը կայացվել է Փարիզում անցկացված 1972 թվականի Համաշխարհային մշակութային և բնության ժառանգության պաշտպանության մասին կոնվենցիայի մասնակից պետությունների Գլխավոր ասամբլեայի 25-րդ նստաշրջանում։ Արևելյան Եվրոպայի տարածաշրջանին հատկացված տեղի համար մրցել են հինգ երկրներ։ Քվեարկության առաջին իսկ փուլում Ադրբեջանը ստացել է 160 պետություններից 92-ի աջակցությունը և ընտրվել Կոմիտեի կազմում։
Համաշխարհային ժառանգության կոմիտեն բաղկացած է 21 պետությունից, այն ՅՈՒՆԵՍԿՕ-ի կոնվենցիայի իրականացումը վերահսկող գլխավոր գործադիր մարմին է։ Դրա հիմնական գործառույթներն են Համաշխարհային ժառանգության ցանկի կազմումը, մշակութային և բնական նշանակության վայրերի ճանաչումը, դրանց պահպանումը և ապագա սերունդներին փոխանցումը։ Կոմիտեն որոշում է Համաշխարհային ժառանգության հիմնադրամի միջոցների օգտագործումը և, պահանջի դեպքում, ֆինանսական աջակցություն է տրամադրում պահպանման աշխատանքներից՝ մինչև կառավարման պլանների պատրաստումը, արտակարգ իրավիճակներում օգնությունը և ինստիտուցիոնալ կարողությունների զարգացումը։
Ուշագրավ է, որ Արցախում հայկական մշակութային, կրոնական ու պատմական ժառանգության ոչնչացմամբ զբաղվող Բաքուն ընտրվել է ՅՈՒՆԵՍԿՕ-ի Համաշխարհային ժառանգության կոմիտեի անդամ։
Հավելենք, որ Ադրբեջանը 2020 թվականի նոյեմբերի 9-ի հրադադարի եռակողմ հայտարարությունից հետո Բաքուն ամեն ինչ անում է՝ թույլ չտալու ՅՈՒՆԵՍԿՕ-ի առաքելության մուտքն Արցախի տարածքներ։ ԵԱՀԿ Մինսկի խմբի համանախագահ պետությունները ևս հայտարարություններ էին արել հայկական մշակութային ժառանգության պահպանման անհրաժեշտության և այդ աշխատանքներում ՅՈՒՆԵՍԿՕ-ի ներգրավման մասին, որը մերժում էր պաշտոնական Բաքուն՝ շարունակելով տարբեր մեղադրանքներ հնչեցնել Հայաստանի ու կազմակերպության հասցեին և խոչընդոտել կազմակերպության առաքելության մուտքին։
Կազմակերպության մշակույթի հարցերով գլխավոր տնօրենի տեղակալ Էռնեստո Օտտոնեն նույնպես հայտարարել էր, որ Ադրբեջանից չեն պատասխանում Արցախ կազմակերպության փորձագիտական առաքելություն ուղարկելու հարցմանը։
Ի դեպ, ՅՈՒՆԵՍԿՕ-ի Մշակութային և բնության համաշխարհային ժառանգության պաշտպանության մասին կոնվենցիայի անդամ պետությունների գլխավոր ասամբլեայի 25-րդ նստաշրջանի շրջանակում Հայաստանն առաջին անգամ ընտրվել է Համաշխարհային ժառանգության կոմիտեի անդամ՝ ստանալով հնարավոր 161-ից 105 ձայն։
