09.06.2026 | 17:19
«Ակրոնը» հրաժեշտ է տվել Էդգար Սևիկյանին
4,3 մլրդ դրամ՝ 45 տրոլեյբուսների համար․ դրանք ՀՀ կհասնեն մյուս տարի
Քաղաքականություն
21.11.2025 | 19:27
Չինաստանից գնված 45 տրոլեյբուսների համար Երևանի քաղաքապետարանն արդեն կանխավճարը փոխանցել է չինական ընկերությանը։ Factor․am-ը ուսումնասիրել է գնման պայմանագիրը, ըստ որի՝ տրոլեյբուսների արժեքը կազմել է 4 մլրդ 326 մլն դրամ։ Յուրաքանչյուր մեքենայի գինը 96 մլն դրամ է։
Համաձայն պայմանագրի՝ վաճառողը պարտավորվում է համաձայնագրի ուժի մեջ մտնելուց հետո 180 օրվա ընթացքում մատակարարել տրոլեյբուսները։
«12 մետրանոց տրոլեյբուսների առավելագույն տարողությունը 85 մարդուց ոչ պակաս կլինի, նստարանների քանակը՝ 25+3։ Սրահում լինելու է առնվազն 1800 մմ երկարության հաշմանդամային սայլակի համար նախատեսված 1 գոտի, իսկ երկրորդ ուղևորային դռան մոտ տեղադրված կլինի սայլակի համար նախատեսված ետ ծալովի թեքահարթակ»,- գրված է պայմանագրում։
Տրոլեյբուսները Հայաստան կհասնեն 2026-ին։ Այս մասին ավագանու նիստին հայտնել էր Երևանի քաղաքապետ Տիգրան Ավինյանը։ Ըստ Ավինյանի՝ քաղաքապետարանը նախատեսում է ձեռք բերել ևս 250 հատ 18 մետրանոց ավտոբուս։
Մեկ ամիս առաջ գործակարգավարական խորհրդակցությանը Տիգրան Ավինյանը հայտնել է, որ վարչապետի հանձնարարականով ֆինանսական աջակցություն է տրամադրվել քաղաքապետարանին տրոլեյբուսներ ձեռք բերելու համար։
Կառավարությունը դեռ սեպտեմբերի 18-ին որոշում է ընդունել Երևան համայնքի համար 45 նոր տրոլեյբուս գնելու և բազմաբնակարան շենքերի 104 հին վերելակ փոխարինելու մասին։ Դրանց համար 2 մլրդ 138 մլն դրամ է հատկացվել։
Հիշեցնենք, որ հունիսին քաղաքապետի նախկին մամուլի խոսնակ Հայկ Կոստանյանը հայտարարել էր, թե Երևանի քաղաքապետարանը չի կարողանա ձեռք բերել տարեսկզբին խոստացված 45 տրոլեյբուսներից 30-ը՝ թերհավաքագրումների պատճառով։ Նրա խոսքով՝ ընդդիմադիր գործիչների առաջնորդությամբ իրականացված ակցիաները, շատերի կողմից շարունակաբար ուղեվարձ չվճարելը բերել են նրան, որ քաղաքապետարանը խոստացած տրոլեյբուսները ձեռք բերել չի կարող։
Անի Թամրազյան
